Naalakkersuisut inatsisiliornikkut pilersaarutiminni suliassaasa ilagissavaat efterskolinut suliassaqarfimmi inatsimmik allannguuteqartitsinissaq, naatsorsuutigalugulu siunnersuummik tamatumunnga atatillugu 2025-imi saqqummiussinissaq. Tamannalu tunuliaqutaralugu Ilinniartitaanermut, Kultureqarnermut, Timersornermut Ilageeqarnermullu Naalakkersuisoq Aqqaluaq B. Egede Ilinniartitaanermut Aqutsisoqarfimmiut peqatigalugit peqataasimavoq Danmark-imi efterskolit peqatigiiffiata ukiumoortumik ataatsimiinnerani ulluni 2. – 3. marts 2024, kiisalu aamma paasisassarsiorluni pulaarsimalluni Galtrup Efterskole-mut kiisalu fagskolinut namminersortunut marlunnut, Struer Fri Fagskole aamma Tronsø Fri Fagskole.
Galtrup Efterskole ukiuni arlaqalersuni ileqqoqarpoq Kalaallit Nunaanniit atuartunik amerlasuunik ilinniartoqartarluni, kalaallit atuartut amerlasuut ilinniarfik taanna toqqissisimanartutut ataatsimoorfittullu pitsaasutut misigisimaffigalugu atuarfigisarmassuk.
Galtrup Efterskole-mut Ilinniartitaanermut, Kultureqarnermut, Timersornermut Ilageeqarnermullu Naalakkersuisup Aqqaluaq B. Egede-p pulaarnermini nunatsinniit atuartut naapippai, tuluttut oqaatsini aamma matematikkimi atuartinneqaleruttortut.
”Assut nuannaarutigaara atuartut ilassisinnaaneri, Galtrup Efterskole-mullu pulaarneq pissarsiffigalugulu paasisaqarfigilluarpara. Pulaarneq paasisaqarfigaarput ilinniarfimmi tassani atuartut aallaavigisaannut suliaannullu atatillugu, minnerunngitsumik atuartut nunatsinneersut eqqarsaatigalugit”, taama oqaaseqarpoq Ilinniartitaanermut, Kultureqarnermut, Timersornermut Ilageeqarnermullu Naalakkersuisoq Aqqaluaq B. Egede.
Fagskole-nut namminersortunut marlunnut pulaarnerup siunertaraa ilisimasassanik katersinissarput paasisaqarnissarpullu ilinniarfeqariaatsimut tassunga atatillugu, Namminersorlutik Oqartussat piffissami matumani tapiiffigisanngisaani.
Fagskolit namminersortut efterskolinut qanittumik aaqqissuussaapput, kisiannili allaanerussuteqarlutik inatsisitigut piumasaqaateqarmat piffissap minnerpaamik pingajorarterutaani assassorfiusumik atuartitsisoqartarnissaanik. Fagskolit namminersortut akuersisuupput inuusuttuaqqat pineqartut ilikkagaqarnerusarnerannik atuartitsinerup / ilinniartitsinerup pingaarnertut assassorluni ingerlanneqartarneranik atuagarsornerullu annikinnerusarneranik.
Fagskole-ni namminersortuni ingerlatsisarnerit siunertaraat atuartunik piareersaarneq inuussutissarsiutinut inuusuttuaqqanullu ilinniartitaanernut ingerlaqqinnissamik, assassornermik sulianut imaluunniit suliffissanut inuusuttuaqqat nuannaarutigisinnaasaannut iluatsiffigisinnaasaannullu.
Fagskole-ni namminersortuni atuartut 16-inik ukioqalereersimassapput, imaluunniit meeqqat atuarfianni naammassisimassallutik.
Efterskoleforening-ip ukiumoortumik ataatsimiinneraniit misilittakkat Danmark-imilu ilinniarfinnut pulaarnernit paasisat atorneqassapput efterskolinut atatillugu inatsisinik nutarterinissami.
Ersarinnerusunik paasisaqarumagaanni attavigineqassaaq Naalakkersuisup allattaa - ministersekretær Rosa Thorsen, e-mail: rose@nanoq.gl imaluunniit tlf. +299 34 50 00.