airplanebooksbriefcase business cogs cross election entertainment fish house law lockmedicalpeopleselfservices socialtax
Iserfissaq

Kalaallit Nunaanni atuartunut naqinnernik ilisarsisinnaanngitsunut suliniut

Nalunaarusiaq uunga tunngasoq: ”Kalaallit Nunaanni atuartunut naqinnernik ilisarsisinnaanngitsunut suliniut, maanna Ilinniartitaanermut Aqutsisoqarfiup saqqummersippaa.
24. november 2020

Nalunaarusiami nunatsinni atuarfiit ilaanni 1.-3. klassemi atuartut allattaatsimik piginnaasaannik misissuineq allaaserineqarpoq. Ilinniartitaanermut Aqutsisoqarfiup misissuineq piffissami 2015-mit 2020-mut ingerlappaa. Tamatumani siunertaavoq, atuartunut allattaatsimik pigiliussiartornermikkut kinguussaasunut, taamalu naqinnernik ilisarsisinnaanngitsuunissamut ilimanaateqartunut eqqumaffeqarnerulernissaq.

Nalunaarusiaq 3. klassep naanerani atuartut allattaatsimik ajornartorsiornerpaat qanoq nassaarinissaannut killiliussinissamut siunnersuuteqarpoq, killiliussallu taassuma atuartut taakku 1. aamma 2. klassimili misilinnerisa inerneri aallaavigalugit qularnaatsumik nassaarereersinnaaneri takutissinnaavai.

Maanna atuarfiit misiligutit nutaat atorlugit 1.-3. klassemi atuartut allattaatsimik pisinnaasaatigut ineriartornerat ingerlaavartumik malittarisinnaanngorpaat, immikkullu pisariaqartitsisut ikorfartugassallu nassaarisinnaalerlugit.

Malugineqassaaq misiligutit naqinnernik ilisarsisinnaanngitsuunermut misiligutaanngimmata, kisianni siusissukkut pasitsaassiniutaallutik aamma atuartut atuarsinnaassusaannik malittarinninniutaallutik, taamaalilluni siusissukkut atuartut naqinnernik ilisarsisinnaanngitsutut ilimanaateqarsinnaasut takusinnaaqqullugit. Taamaaliornikkut atuarsinnaanikkut atuartitsinermik tulluarsagaanerusumik suliniuteqarsinnaaqqullugu aamma atuartut ataasiakkaat ineriartornerinut malinnaasoqarsinnaaqqullugu.

Suliap naammassineranut Ilinniartitaanermut Naalakkersuisoq Katti Frederiksen ima oqaaseqarpoq:

Nuannaarutigaara suliaq annertooq inuiaqatigiinnilu pisariaqartinneqaqisoq manna naammassilluni saqqummermat. Atuarsinnaaneq inuup inuiaqatigiinni inooqataanermini sakkussaasa annerpaartaraat, taamaattumik Naalakkersuisuni tamassuma nukittorsarneqartuarnissaa politikkikkut anguniagariuarparput. Kikkulluunniit ikiorserneqarnissaminnut pisinnaatitaaffeqarput, pitsaanerpaavorlu siusissukkut iliuuseqarnissaq.

Suliaq una aallartisarneraniilli soqutiginnillunga malinnaavigisimavara, suliammi kalaallisut oqaatsigut aallaavigalugit ineriartortitat qaqutigoorluinnartuupput.
Taamaattumik, atuarfiit susassaqartullu allat nalunaarusiamik atuaaqqullugit kaammattorumavakka, tassanimi atuartut akornanni atuarsinnaaleriartornermut ilisimanik nutaanik atuartitsinermilu atorneqarsinnaasumik tunniussisoqarpoq. Taamattaaq atuarfiit tamaasa kaammattorumavakka, misiligutinik nutaanik atueqqullugit taamaalillutik atuartuutimik allassinnaaleriartonerannut atuarsinnaaleriartornerannullu eqqumaffeqarnerulerniassammata
”.

1.-3. klassemi misiligutit pillugit saaffissaq: ILA@nanoq.gl

Paasissutissanik allanik pissarsiniarnermi naqinnernik ilisarsisinaanngitsut pillugit atuarfinnut siunnersorti attavigineqarsinnaavoq, Karina Meincke kame@nanoq.gl

Nalunaarusiaq maana takujuk

Dysleksi rapport