Spili finskit ilisimatuuisa Jyväskylä Universitetimeersut ineriartortitaaraat. Naqinnerup ilusaata nipaatalu ataqatigiinnerannik atuarnialernermullu annertuumik sungiusarnersaq siunertaralugu ilusilersugaavoq, taamaammallu meeqqat naqinnernik ilisarsisinnaanngitsutut ilimanaateqarsinnaasut tapersersornissaat siunertaralugu inerisitaalluni.
Spili Ilinniartitaanermut Aqutsisoqarfiup kalaallisuunngortitaraa 1. klassenullu misileraatigalugu. Spili atuartunut 6-9 ukiulinnut tulluarsagaavoq atuarfimmi angerlarsimaffimmiluunniit atorneqarsinnaasoq.
Spili atuartunut naqinnernik ilisarsisinnaanngitsunut suliniutip ilagaa. Suliniutip anguniagaasa ilagaat, misissuinikkut paasisat uppernarsaasersukkallu aallaavigalugit iluaqutaasinnaasunik atortussiorneq siusissukkut iliuuseqarnissaq siunertaralugu, taakkumi atornerisigut atuarniarnikkut ajornartorsiuteqarpallaalernissaq pinaveersaartinneqarsinnaammat.
Spilip saqqummerneranut atatillugu Ilinniartitaanermut Naalakkersuisoq Peter Olsen ima oqaaseqarpoq:
”Nuannaarutigaara nunatsinni siullermeersumik kalaallit oqaasii atorlugit pinnguarnikkut atuarnermik ilinniummik digitaliusumillu saqqummertoqarmat. Atortussiat digitaliusut atuartitsinermut ilaalluinnalersimapput pinngitsoorneqarsinnaajunnaarlutik, taamaattumik periarfissat taamaattut qaqutigoortut nutaaliaasullu meerartatta atuarsinnaanerannut iluaqutaasinnaasut atorluarneqarnissaat kissaatiginarpoq. Atuarsinnaaneq nunatsinni nukittorsagassatta annersaasa ilagaat, pingaartumillu naqinnernik ilisarsisinnaanngitsut siusissukkut iliuuseqarfiginissaat, taamaaliornikkummi sakkortuumik ajornartorsiuteqalernissaraluannik pitsaaliuisoqarsinnaammat. Ilikkagaqassagutta atuarsinnaalertariaqarpugut, soorlu taamak oqariartaaseqartoq”.
Spili akeqanngilaq ilinniartitsisunillu angajoqqaanilluunniit aaneqarsinnaalluni Androidinut og tabletinulluunniit ikkussiniarnermi Google Play store –mut iserluni imaluunniit iOS-inut ikkussiniarnermi App Storemut iserluni una ujarlugu: ”GraphoGame Kalaallisut”.
Iserfissat
GraphoGame
Naqinnernik ilisarsisinnaanngitsunut suliniut
Annertunerusumik paasisaqarusukkaanni saaffigisassaq:
Atuarfinnut siunnersorti Mette Larsen Lyberth
Email: mell@nanoq.gl
Oqarasuaat: 34 62 78
