2022-ip ukiaani ilisarnaatissamik unammisitsineq iluatsilluarpoq, Ilinniartitaanermullu Aqutsisoqarfiup Kalaallit Nunaanni meeqqerivinnit, atuaqatigiiaanit Majoriarmiuniillu ilisarnaatissatut siunnersuutit 100-t sinnerlugit tiguai.
Ilisarnaammik siunnersuusiortut Nanortallip Atuarfiani 7.a-t ajugaasutut toqqarpagut, nuna tamakkerlugu pimmatiginninneq akiorniarlugu periusissiamut paaqqinnittarfinni, atuarfinni, inuusuttut ilinniarfiini atuartullu angerlarsimaffiini.
Ilisarnaasiami ajugaatinneqartumi seqernup nunarsuaq pakkusimavaa. Assilissami seqernup nunarsuullu ataqatigiinnerat isumaavoq, soorlu inuit imminnut pisariaqartinnerat susassareqatigiinnerallu taamaattoq. Peqatigiinneq, ataatsimoorneq atugarissaarnerlu nunarsuarmi inunnut tamanut pingaaruteqarpoq.
Ilisarnaammik unammisitsinermi ajugaasut tulleraat Qeqertarsuarmi perorsaasut meeqqallu marluk-sisamanik ukiulinnut meeqqerivik ”Kuluk”-meersut. Inersimasut meeqqallu ataatsimut pinngortitamiit naasut ujaqqallu katersoriarlugit nipititerlugit qalipaatigissunngorlugu assilialiarisimavaat. Uani ataatsimut pinngortitap nukinnik aallerfigineqarsinnaanera, ataatsimoornikkullu pimmatiginnittarnerup pinngitsoortissinnaanera oqariartuutaasinnaavoq.
Ajugaasuni pingajuupput Maniitsumi Majoriami atuartut. Inuit pingasut qungujulallutik tasiortut titartarsimavaat. Tassani peqatigiinnerup nuannersua, mattussineq pimmagitiginninnerlu pinnagit akaareqatigiinnerup ataatsimoornerullu inunnik toqqissisimatitsilersarnera ersersinneqarpoq.
Ilisarnaatissamik unammisitsinermi akissarsissutaapput: Akissarsiaq anneq 10.000 kr., akissarsiap aappaat 3.000 kr. aamma akissarsiat pingajuat 2.000 kr.
Ilisarnaatit taakku pingasut atortussiani, nittartakkani inuillu internetikkut ataatsimoorfiini atorneqartassapput, sumiffinni nunamilu tamarmi pimmatiginnittarnerup akiornerani sulissutiginera ersersinniarneqartassalluni. Nuna tamakkerlugu pimmatiginnittarneq akiorniarlugu periusissiamik atuutsitsilernissami ukiuini siullerni pingasuni ilisarnaatit atorneqartarumaarput.
Titartagarpassuit kusanartut isumassarsinartullu pivagut – nittartakkatsinnilu ukiumi nutaami takutinneqartarumaarput, taamaalillutik ulluunerani paaqqinnittarfiit, atuarfiit, sunngiffinnilu sammisaqartitsisartut allallumi, aallugit meeqqanut oqaloqatigiissutissatut pilersitsiniarnerminnilu isumassarsiorfigisarsinnaavaat. Meeqqat inuusuttullu ilisarnaatissatut siunnersuutigalugit nassiussimasaannut qujarujussuarpugut, tamaasa nuannaarutigalugillu akueraagut.
Paasisaqarnerorusukkuit uunga attaveqarit:
Ilinniartitaanermut Aqutsisoqarfimmi suliamik aqutsisoq, Karen Mathiesen, tlf. 346210 imlt. kama@nanoq.gl
