Atuarfiusup aallartinnissaa qallivoq. Tamatta nalunngisatsituut atualerlaanut immikkut pingaaruteqartuuvoq – aammali atuartunut tamanut aasarsioreerlutik atualeqqittunut klassimullu tulliuttumut ingerlariaqqittunut.
Aammattaaq ukiup atuarfiusup nutaap aallartinnerani sulinerup aallartinnera ilinniartitsisunut atuarfiullu aqutsisuinut pingaaruteqarpoq. Ilinniartitaanermut Aqutsisoqarfiup kaammattuutigaa atuarfiusup nutaap aallartinnera pimmatiginnittarnerup atuarfimmilu atugarissaarnissap malunnartinneqarnissaannut atorneqassasoq. Atuarfiusup nutaap aallartinnera taamatut malunnartitsinermi ilisarnaataassaaq ajattorneqarani atuarsinnaatitaanermut.
Ataani ilannguppagut nuna tamakkerlugu pimmatiginninneq akiorniarlugu periusissiaq tunngavigalugu isumassarsiassatut, atuarfiusup aallartinnera aamma atuarfik qanoq akaareqatigiiffiullunilu immikkoortitsiffiunngitsoq pingaartitatut suliniutigineqarsinnaasoq.
Inussiarnersumik inuulluaqqusilluta
Ilinniartitaanermut Aqutsisoqarfik Kaali Olsen (Aqutsisoqarfimmi pisortaq) aamma Karen Mathiesen (nuna tamakkerlugu pimmatiginninneq akiorniarlugu periusissiap piviusunngortinneqarnerani aqutsisoq).
Atuarfiusup aallartinnerani malunnartitsinermi atuarfinni pimmatiginninneq akiorniarlugu atugarissaarnissamullu suliniutinik isumassarsiassat: |
| 1. Atuarfinni pimmatiginninnermut akuiniarnermik aammalu atugarissaarnissamik suliallit atuarnerup isumaanik oqaasinngortitsinerat, soorlu atualertunut angajoqqaanullu tikilluaqqusilluni oqalugiarnerit. Taamaasilluni pingaartitat taakku ullormi siullermi atualernermiit pigiliunneqarsinnaallutik. |
| 2. Aalajangiullugu uani ukiumi atuarfiusussami atuarfissinni pimmatiginnittarneq akiorniarlugu politikkissamik ineriartortitsisoqassasoq. Politikkeqareerussilu – misissussagissi nutarterneqarnissaanut pisariaqassanersoq. Assersuutigalugu digitalikkut pimmatiginnittarneq ilaareerpa? Aamma atuartut atuarfimmi politikkersi ilisimavaat? |
| 3. EQQAAMALLUGU pimmatiginninneq ataatsimoorfinniit ajattuiffiusuusarmat – aammalu pimmatiginninneq piuleraangat klassimi avatangiiserineqartoq tamaat isigalugu iliuuseqartoqartartussaammat. Ilinniartitsisoqatigiinni eqqartuigitsi, atuarfimmi ataatsimooriaatsit pillugit qanoq suliaqarsinnaanersusi. |
| 4. Ilinniartitsisoqatigiinni eqqartuigitsi qanoq qaqugukkullu qulequtaq ‘pimmatiginninneq atugarissaarnerlu’ uani ukiumi atuarfiusussami atuartitsinerni ilaatinneqassanersoq (allatani, filmini, suliakkiussani il.il) assersuutigalugu fagini: kalaallisut, qallunaatut, tuluttut, inuttut inerikkiartornermi aamma inuiaqatigiilerinermi. |
| 5. Pimmatiginninnermut akiuiniarneq klassikkaartumik angajoqqaanik ataatsimiisitsinermi siullermi oqaluuserisassamut ilanngussiuk – aamma angajoqqaat klassimi akaareqatigiinnissaq qanoq ikorfartorneqarsinnaaneranik isumassarsiassanik nutaanik pilersitsinissaannut qaaqqusigit. |
| 6. Atuagarsornikkut ilisimasanik aamma paasissutissanik annertunerusunik pissarsigitsi nuna tamakkerlugu pimmatiginninneq akiorniarlugu periusissiami: Ny Strategi mod mobning (iserasuaat.gl) |
