MIO suliniummi pissanganarluinnartumik ingerlatsivoq, tassani Tænketanken Mandag Morgen suleqatigalugu – LEGO Fondenilu aningaasaliisoralugu – Kalaallit Nunaanni meeqqat inuusuttullu qanoq innersut suullu takorluugarineraat paasiniarparput. Suliniut MIO-mit ingerlanneqarpoq, uanilu siunertaavoq Kalaallit Nunaanni meeqqat inuunerinnerunissaat pisinnaatitaaffiisalu malinneqarnerunissaat anguniarlugu ilisimasaqarnerulernissaq.
Suliniummi Kalaallit Nunaanni meeqqat nipaat – kinguaariinnik ukkataqarneq -mi meeqqat inuuneranni attuumassusillit tamaasa ukkatariniarpagut – soorlu ilaquttat, atuarfik, ikinngutit sunngiffillu. Aatsaat taama angitigisumik ingerlatsisoqalerpoq, atuarfimmilu atuartuni kinguaariit tamakkerlugit ilanngunneqassapput – aamma tusarfigineqarpiarneq ajortut, tassa meeqqat immikkut pisariaqartitsisut meeqqallu inuiaqatigiinni tikikkuminaatsiniittuusut. Klassinit tamanit sumiiffinniillu tamanit paasissutissanik katersinikkut suliniummi paasissutissanik annertuunik pissarsissaagut, siunissamilu aaqqiissutissanik taakkartuilerutta tunngavissaqarlualissalluta.
Suliniummit paasissutissanik katersinermi immersugassat atuarfinni atuartunut tamanut nassiunneqartussat atorneqassapput – tassanilu illerpiaq pisariaqartippatsigit 🙌.
Atuarfimmi attaveqaat suua?
Maanna atuarfimmi attaveqaammik nunatsinni atuarfinni ilinniartitsisunik attaveqaataasinnaasumik pilersitsiniarluta suliaqarpugut. Attaveqaammi ilaasortatutuagutsinnut suleqatissaavutit pingaarutilik. Ilaatigut:
• Immersugassaq atuartunut saqqummiullugulu nassuiaassissutigissavat
• Paasissutissanik katersinermi najuutissaatit
• Apeqqutit akisassavatit meeqqallu pisariaqartitsisut ikiortassallugit
Meeqqat toqqissisimasumik nuannersumillu misigisaqarnissaannut – aammalu oqaatiginiagaasa torersumik pissarsiarineqarnissaannut atuarfimmi attaveqaat pingaaruteqarpoq.
💡 MIO-ttaaq anguniagaraa siunissami meeqqat pillugit suliniuteqarnermi meeqqat nipaasa ilanngunneqarnissaannut atuarfimmi attaveqaat atorlugu ilinniartitsisut akornanni ataatsimoorfiullunilu attaveqaataassasoq.
Suli aalajangerneqanngilaq attaveqaat nuna tamakkerlugu imaluunniit kommunikkaarlugu aaqqissuunneqassanersoq – naleqqunnerusoq aallaaviussaaq, tassungalu tunngatillugu ilissi aamma isummasi tusarusuppagut.
Apeqqutit meeqqaneersuupput
Apeqqutit eqqortut apeqqutigineqarnissaat anguniarlugu illoqarfinni assigiinngitsuni meeqqat isummersorfiinik aammalu eqimattani meeqqanik apersuineq ingerlatereerparput. Taakkua misilittagaat eqqarsartaasiilu aallaavigalugit immersugassaq suliarineqarnikuuvoq.
Immersuisoqareerpat Tænketanken Mandag Morgen peqatigalugit aggerluta ataasiakkaanut apersuineq ingerlatissavarput, periutsillu allat atorlugit itinerusumik aamma paasiniaassalluta, taamaaliornikkut paasisat piviusumut qaninnerpaanissaat qulakkeerniarsaraarput.
Piareersarluarneqassaasi
Soorunami kisimiissanngilatit. MIO-mit Tænketanken Mandag Morgenimiillu suliniut immersugassarlu pillugu paasissutissiiffigilluarneqassaatit. Ilimanarpoq tamanna Teams aqqutigalugu nittartakkatiguussasoq ulluinnannullu ulapaarfiusumut naleqquttumik inissinneqarumaarluni.
Atuarfimmi attaveqaatitut peqataanikkut aamma illit pissarsiaqassaatit:
• Kalaallit Nunaanni meeqqat tamakkerlutik tusaaneqarnissaannut sunneeqataassaatit
• Kalaallit Nunaat tamakkerlugu ilisimasallit attaveqataanni peqataalissaatit
• Atuartitsininnut toqqaannartumik atorsinnaasannik ilisimasanik nutaanik isumassarsianillu pissarsissaatit
• Suliniummi paasisat periutsillu pissarsiarisinnaassavatit
• Sumiiffinni nunalu tamakkerlugu meeqqat atugarisaannik pitsanngorsaaffiusinnaasumi peqataalissaatit
• Tusarfiginngikkutsigit ukiap ingerlanerani atuarfimmi aqutsisut saaffigisinnaavagut paasiniarlugu suleqatigiinni kikkut attaveqaammi peqataarusussinnaanersut – peqataatikkusoqaatsigit.
Soqutiginnippit?
Massakkut eqqarsaruit: ”Peqataarusunnaq!”, taava Camillamut Jâqqamulluunniit allaannarsinnaavutit. Tusarfiginissarsi qilanaaraarput.
Tusagaqanngikkutta imaassinnaavoq ukiap ingerlanerami atuarfimmi pisortat attavigitigut paasiniarlugu atuarfimmit attaveqaammut kikkut piukkunnarnersut.
Attavigisigut
📧 Jâraq Lorentzen
Meeqqanut siunnersorti, MIO
jalo@mio.gl
📧 Camilla Lennert
Suliniummi aqutsisoq, MIO
cmle@mio.gl
