Pimmatiginnittarneq pillugu logoliat

Ulluunerani paaqqinnittarfinni atuarfinnilu qanoq atorneqarsinnaappat?

2022-mi Ilinniartitaanermut Aqutsisoqarfik ilisarnaasiortitsilluni nuna tamakkerlugu meeqqanik inuusuttunillu unammisitsivoq. Siunertaasoq tassaavoq ilisarnaatit pimmatiginnittarnermik akiuiniarluta sulinitsinnut atorneqarnissaat.

100-nit amerlanerusunik nassiussarsivugut. Taakkunannga 30-t sulinitsinnut immikkut tulluartuusorisavut toqqarpavut, maannalu matuma ataani saqqummiullugit. Ilisarnaatit ulluunerani paaqqinnittarfinnut, atuarfinnut Majorianullu assigiinngitsutigut isumassarsisitsisinnaapput.

Aaku siunnersuutigineqartut arlariit:

1: Suliffeqarfissinni, atuarfissinni Majoriamilu ilisarnaasiornermik unammisitsineq

Pimmatiginnittarnermik akiuiniarnissinni suliniutigisarsi nammineerlusi ilisarnaasiornissigut erseqqissassavarsi. Ilisarnaasiortitsillusi unammisitsigitsi.

Aallaqqaammut ilisarnaatit Ilinniartitaanermut Aqutsisoqarfimmeersut takutikkit, taavalu meeqqat inuusuttullu peqatigalugit oqaloqatigiissutigalugit.

Siunnersuutigineqarsimasunit takutinneqartoq aalajangersimasoq ataaseq toqqarsimagaluarussiulluunniit siunnersuutigineqartut ass. piffissap ilaani saqqumisussanngorlugit saqqumisussanngorsigit, taamaasiornikkut saqqummersitat assigiinngissusii kikkunnilluunniit takuneqarsinnaassammata.

2: Pimmatiginnittarnermik akiuiniarluni titartakkat – nukarliit

Ilisarnaatit Ilinniartitaanermut Aqutsisoqarfimmeersut suli atualinngitsut atuartullu nukarliit pimmatiginnittarnermik akiuiniarlutik titartaanissaannut isumassarsiorfiusinnaapput.

Meeqqat tamarmik pimmatiginnittarnermik akiuiniarneq ikinngutinnersumillu peqatigiittarneq pillugit titartaanissamut qaaqquneqassapput.

Titartaanissaq sioqqullugu perorsaasut ilinniartitsisulluunniit meeqqerivimmi atuarfimmilu ikinngutaalluarnerup qanoq isumaqarnera pillugu oqaluttuassapput.

Titartakkat isumassarsiaq pillugu nassuiaatitallit piffissap ilaani nivingatinneqarsinnaapput, taamaasillutik allat taakkunannga isumassarsisinnaassammata. Aamma titartakkat nittartakkani, allakkani allanilu atorneqartussatut assilineqarsinnaapput (taamaaliussagussi eqqaamasiuk tamanut saqqummiussiniarnermi meeraq akuersitinneqaqqaassammat).

3: Pimmatiginnittarneq pillugu allaaserinnilluni suliassat – akulliit, angajulliit Majoriamilu atuartut (didaktikkikkut suliniutit)

Ilisarnaatit inuusuttuaqqanit inuusuttunillu Ilinniartitaanermut Aqutsisoqarfimmut nassiunneqarsimasut atorsigit – assersuutigalugulu allaaserinnilluni suliassamik matuma kinguliiniittut najoqqutaralugit suliassillugit (uku angajullernut naleqquttuupput, atuartuutivillu ukioqqortussusiannut naleqquttunngorlugit allanngortitersinnaavatit):

Ilisarnaammik toqqaagit.
Ilisarnaat nassuiaruk (takutinneqartoq isummannik ilanngussinak nassuiaruk; qalipaatit ilutsillu sorliit atorneqarsimappat?)
Ilisarnaat ilinnut qanoq isumaqarpa? (Takutinneqartoq pillugu isummatit uani allassinnaavatit.)
Atuarfimmi atuartut akunnerminni pimmatiginnittarnerannut ilinniartitsisut qanoq iliuuseqarsinnaasoraagit?
Atuartut atuarfimmi pimmatiginnittoqartarneranut qanoq iliuuseqarsinnaasoraagit?
Pimmatiginnittarnermik akiuiniarnermut oqaasinnaarineqarsinnaasussarsiorit.

Ilisarnaatit aakkit

Una tooruk ilisarnaatit unammisitsininngaanneersut aassagukkit (.zip-fil).