Siornatigummi pimmatiginnittarneq inuit ataasiakkaat sanngiiffiinut tunngatinneqartarsimagaluaq maanna ’nutaami’ avatangiisit sanngiiffiinut (aamma) tunngatinneqartalerpoq.
’Pisoqqami’ inuit ataasiakkaat eqimattakkuutaani pisartumut taassumunnga pisuusutut isigineqartarput. Pimmatiginnittarneq pillugu ilisimasat nutaat tunngavigalugit pimmatiginnittarneq iliuuseqarfigissagaanni inunnut, ass. meeqqerivinni, atuarfinni sunngiffimmilu neqeroorutaasuni, ataatsimoortunut sunniutaasartut tamaasa tapullugit isiginiagassaapput.
Tassa imaappoq, pimmatiginnittarneq pillugu isiginneriaaseq ’nutaaq’ naapertorlugu suliaqassagaanni inuit ataasiakkaartut pissusiisa piumasaasalu ataqatigiinnerat qiviarneqassaaq. Aamma angerlarsimaffimmi pisartut qiviarneqassapput, meeqqalli angerlarsimaffimmi peroriartornermini perorsagaanera kisiat isiginiassallugu amigarmat meeqqap inoqatini peqatigalugit pitsaasumik atugaqartitaanerminik misigisarnera aamma qiviarneqartariaqarpoq.
Qinngasaariffiunngitsunimi meeraqartarportaaq angerlarsimaffimmi unammilligassaqartartunik, taamaattumik meeqqap ataatsip tunuliaqutaannaa qinngasaariffiusumut sunniuteqarneq ajorpoq, sunniuteqartartulli amerlanerullutik. Malugiuk ’pisoqaq’ ’nutaarlu’ maani eqqartoratsigit isumaqanngimmat ’pisoqqap’ atorunnaarsimaneranik. Sulimi isiginneriaatsitut atuuppoq, pingaartumik amerlanersatsinni pimmatiginnittarnerup isumaliutigeqqinneqartariaqarneranik qaangerniarneqartariaqarneranillu takorluugaqartuni.
