Ilaqutariit attaveqaataasartut

Danmarkimi efterskolernissamut Namminersorlutik Oqartussanit tapiiffigineqarnissamut piumasaqaataavoq atuartup ilaqutariinnik attaveqaateqarnissaa. Ilaqutariinnik attaveqaateqartitsisarluni aaqqissuussineq atuartup angajoqqaavisa ilaqutariillu attaveqaataasartut namminerisaminnik akunnerminni aaqqissuuttarpaat, angajoqqaallu ilaqutariinnik attaveqaataasartussanik naapertuuttunik pissarsinissartik namminneq akisussaaffigaat. Ilaqutariit attaveqaataasartut assersuutigalugu tassaasinnaapput ilaquttat ikinngutilluunnit Danmarkimi najugaqartut.
Ilaqutariittut attaveqaataaneq nammineq kajumissuseq naapertorlugu pisarpoq akissarsissutigineqartaranilu.

Ilaqutariinnit attaveqaataasartunit ilimagisaavoq atuartoq imminni najugaqartittassagaat atuarnerup aallartinngitsiarnerani aamma naammassereernerata kingorna atuartup angerlamut aallanngitsiarnerani kiisalu atuanngiffinni sapaatip-akunnerisa naanerisa ilaanni.

Efterskolit atuarfiit feeriarnerisa nalaanni matoqqasarput taamatullu ukiup atuarfiusup ingerlanerani sapaatip-akunnerisa naanerini arlalialunni matoqqasarlutik, piffissanilu taakkunani atuartut efterskolimiissinnaasanngillat.
Atuartut Danmarkimi najugallit atuarfiit feeriarnerisa nalaanni sapaatit - akunnerisa naanerani matoqqaffiusuni ilaqquttaminnukarsinnaasarput – kalaallilli efterskolertut taamatut periarfissaqanngillat – akerlianilli ilaqutariinnut attaveqaataasartunukarsinnaallutik.

Ilaqutariit attaveqaataasartut atuartut Danmarkimi efterskolernerisa nalaanni angajoqqaanut ”sinniisuunissartik” piareersimaffigisariaqarpaat aammattaaq piareersimaffigisariaqarpaat tarnikkut tigussaanerusutigullu ikiuuttarnissartik.
Ilaqutariinni attaveqaataasartuni atuartup efterskolimi misigisami eqqartornissaat pissuseqarfiginissaallu periarfissaqarfigisarpaa. Ilaqutariit attaveqaataasartut oqaatsitigut kulturikkullu unamminartut atuartup efterskolernermini naammattoorsinnaasaasa oqaasertalersulernissaat peqataaffigisinnaavaat.

Atuartup angajoqqaavi meeqqami efterskolernerani tamakkiisumik akisussaapput, kisianni aamma ilaqutariit attaveqaataasartut akisussaaffeqarput assersuutigalugulu tamatigut ilisimasariaqarlugu atuartoq sumiinnersoq.
Ilaqutariit attaveqaataasartut atuartumut angajoqqaatut oqartussaasutut inissisimanngillat - efterskolernerup nalaani atuartup angajoqqaavi meeqqaminnut oqartussaasutut inissisimajuassapput.

Ilaqutariit attaveqaataasartut efterskolip aaqqissuussinerinut assigiinngitsunut peqataasarnerisigut atuartumit, atuartup angajoqqaavinit efterskolimillu qulariunnaarneqartarpoq ilaqutariit attaveqaataasut akisussaaqataasut atuartullu ataasiakkaat attaveqaataannut peqataalluinnartut.

Pingaartuuvoq ilaqutariit attaveqaataasartut suliassaminnik ilisimaarilluarnissaat. Ilaqutariit attaveqaataasartut meeqqanik ataasiakkaanik sullissinissartik meeqqamullu akisussaaqataanissartik piareersimaffigisariaqarpaat. Akuersissummik atsiortigatik ilaqutariit attaveqaataasartut paasilluarsimasariaqarpaat, ilaqutariittut attaveqaataasarneq sunik nassataqartarnersoq.

Atuartoq sapaatip–akunnerisa naanerini feerianilu ilaqutariinni attaveqaataasartuniittartussaammat ilaqutariit attaveqaataasartut najugaqarfiata efterskolimut naleqqiullugu qanoq ungasitsiginera pingaaruteqarpoq – annermik atuartup busserluni qimuttuitsorlunilu ilaqutariit attaveqaataasartut ornittassappagit. Taamaammat isumassarsiatsialaassaaq efterskolimik ilaqutariinnut attaveqaataasartunut ungasippallaanngitsumik ujarlernissaq.

Atuartup angajoqqaavi Namminersorlutik Oqartussanik tapiissutinik qinnuteqarnerminni ”Ilaqutariinni attaveqaataasartunit akuersissut” ilanngutissavaat. Akuersissut Sullissivik.gl-imi aaneqartussaq ilaqutariinnit attaveqaataasartunit atuartullu angajoqqaavinit atsiorneqassaaq (takuuk immikkoortoq ’Ilaqutariit attaveqaataasartut’).

Akuersissut ukioq atuarfiusoq tamaat atuuppoq. Akuersissut illuatungeriinnit tamanit atorunnaarsinneqarsinnaavoq, kisianni kaammattuutigineqarpoq ajornartorsiuteqalertoqarnerani Kalaallit Illuat attavigineqartassasoq.

Angajoqqaat aamma ilaqutariit attaveqaataasartut assersuutigalugu makkua pillugit erseqqissumik isumaqatigiissuteqartariaqarput:

• Atuartoq qanoq akulikitsigisumik ilaqutariinnut attaveqaataasartunut tikeraartassava
• Efterskolip aamma ilaqutariit attaveqaataasartut najugaqarfiata akornanni angalanermut aningaasartuutit kiap akilertassavai
• Atuartup ilaqutariinni attaveqaataasartuniitilluni nerisaqarneranut akiliuteqartoqartassanersoq
• Ilaqutariit attaveqaataasartut atisanik errorsinermut akilerneqartassappat
• kaasarfimmiussat
• aningaasartuutit siumut takorloorneqareersinnaanngitsut
• ilaqutariit attaveqaataasartut angerlarsimaffianni qanoq malittarisassaqartoqarpa (atuartoq unnukkut qassinut angerlarsimareertassava, atuartoq nerisassiornermut assigisaanullu ikiuuttarniarpa, pujortartarneq il.il. pillugit malittarisassaqarpa?).

Ilaqutariit attaveqaataasartut akuersissummik atsiornermikkut pisussaaffigilissavaat:

• atuartup Danmarkimut apuunnerani aanissaa
• atuartup angerlalernerani mittarfimmut qaninnermukaannissaa
• feeriani, sapaatip-akunnerisa naanerini atuartullu napparsimanerani najugaqartittarnissaa
• sapinngisaq naapertorlugu efterskolimi angajoqqaat ataatsimiisinnerinut aaqqissuussinernullu peqataasarnissaq
• atuartup ikiorlugulu tapersersornissaa
• atuartup angajoqqaavi, efterskoli aamma Kalaallit Illuat suleqatiginissaat
• nuunnermi aamma/imaluunniit attaveqarnissamut paasissutissat allanngornerini Kalaallit Illuannik ilisimatitsinissaq.

Pingaartuuvoq atuartup ilaqutariillu attaveqaataasartut akornanni pissutsit pitsaasuunissaat. Atuartup ilaqutariillu attaveqaataasartut akornanni ajornartorsiortoqalissappat, Kalaallit Illuat efterskolimut qaninneq attavigineqartariaqarpoq.

Ilaqutariit attaveqaataasartut akuersissutertik tunuartissappassuk, ilaqutariinnik attaveqaataasartussanik nutaanik piaarnerpaamik ujartuinissaq angajoqqaat namminneq akisussaaffigaat. ”Ilaqutariit attaveqaataasartut akuersissutaat” nutaaq atsiorneqassaaq Kalaallit Illuannullu Efterskolimut qaninnermut aamma Efterskolinut Ingerlatsivimmut nassiunneqassalluni.

Ilaqutariit attaveqaataasartut akuersissutertik tunuartissappassuk allanilluunniit peqquteqartunik atuartoq ilaqutariinnik attaveqaataasartueruppat pingaartuuvoq angajoqqaat piaarnerpaamik Kalaallit Illuannut efterskolimut qaninnermut attaveqarnissaat.

Atuartoq ilaqutariinnik attaveqaataasartuerukkuni Danmarkimi efterskolernermut Namminersorlutik Oqartussat tapiissuteqarnissamut piumasaqaataat eqquutikkunnaassavai. Tamatuma kingunerissavaa efterskolerneq unitsittariaqarmat atuartorlu angerlartariaqarluni.