Sunngiffik

Atuartut efterskolimiinnerminni sunngiffimminni sammisaqarnissaminnut periarfissaqarluarput, efterskolip inai, ataatsimoortarfii atortuilu allat atorsinnaallugit – ini aalajangersimasoq atorumagaanni immaqa ilinniartitsisoq isumaqatigeqqaartariaqassaaq.

Imaassinnaavoq eqqissisimaarnissaq pisariaqartinneqartoq, immaqa pisuttuartoqarusuppoq, nallukattarusuttoqarpoq imaluunniit ataatsimoortarfimmi ikinngutit oqaloqatigerujoornissaat kissaatigineqarluni.

Atuartoq ungasinnerusumut pisuttuarniaruni imaluunniit cyklerniaruni tamatigut ilinniartitsisullu isumaqatigiissutigeqqaartassavaat, atuartup sumiinnera ilinniartitsisut ilisimaniassammassuk.

Efterskolertut ilaat sunngiffimminni najukkami peqatigiiffimmut ilaasortanngortarput, assersuutigalugu arsartartut imaluunniit sulorartartut peqatigiiffiannut. Taamaalillutik soqutigisamik sunngiffimminni aallunnissaat periarfissaqarfigisarpaat.

Nalinginnaavoq efterskolit ataatsimik amerlanernilluunniit ataatsimoortarfeqartarnerat atuartut sunngiffimminni oqaloqatigeerujoorfigisinnaassaannik aliannaarsaarfigisinnaasaannillu, assersuutigalugu spil-erlutik imaluunniit TV-kkut arsartunik isiginnaarlutik.

Efterskolimi atuartut ullup unnuallu annersaa inunnik allanik ilaqartuartarput assigiinngitsorpassuarnillu pisoqartuartarluni – taamaammat sunngiffimmi eqqissisimaalaarnissaq imaluunniit kisimiilaarnissaq pisariaqartinneqarsinnaavoq.

Efterskolit ilaat ininik nipaarsaarfiusussanik peqartarput, atuartut eqqissisimaarfigisinnaasaannik. Eqqissisimaarnissamut periarfissat allat tassaapput kisimiilluni pisuttuarneq imaluunniit cyklerneq – efterskolip avataanut atuartoq ungasinnerusumut pisuttuarniaruni cyklerniaruniluunniit tamanna ilinniartitsisunut isumaqatigiissutigeqqaartassavaa, taakkua atuartup sumiinnera ilisimaniassammassuk.

Sapaatip-akunnerisa naanerisa ilaanni atuartut namminneq toqqarsinnaavaat efterskolimiiginnarniarnerlutik imaluunniit ilaqutariinnut attaveqaatiminnukarniarnerlutik. Sapaatip-akunnerisa naanerisa ilaanni aaqqissuussisoqartarpoq atuartut pinngitsooratik peqataaffigisassaannik.

Efterskolit ilaat sapaatip–akunnerisa naanerisa ilaanni aalajangersimasunik qulequtsiillutik sammisaqartitsisarput tassanilu atuartut nuannersunik allaanerusunillu ataatsimoorlutik sammisaqartarput. Taakku assersuutigalugu tassaasinnaapput qarasaasiakkut pinnguaatinik sammisaqartitsinerit, nukappiaqqanut sammisaqartitsinerit, niviarsiaqqanut sammisaqartitsinerit imaluunniit nipilersornermik sammisaqartitsinerit.

Sapaatip-akunnerisa naanerini sammisaqarfiusussaanngitsuni atuartullu efterskolimiiginnarfigisaanni assigiinngitsunik sammisaqarnissamut, qasuersaarnissamut aamma sivisuumik sininnissamut piffissaqarluartoqartarpoq, immaqa aamma ulluinnarnit allaanerusunik nerisassaqartarpoq. Qaqugukkut innarnissaq, sunik sammisaqarnissaq il.il. atuartut ilinniartitsisullu sapaatip-akunnerata naanerani sulisut akunnerminni isumaqatigiissutigisarpaat.

Sapaatip-akunnerisa naanerisa ilaanni efterskoli matoqqasarpoq, atuartullu efterskolimiissinnaasanngillat. Sumiiffiit ilaanni ileqquuvoq kalaallit efterskolertut efterskolerisaminni sapaatip akunnerisa naanerini aaqqissuussisarnerat, taamaaliornikkut ikinngutitoqqat naapinneqarsinnaapput.

Efterskolit amerlanerpaat atuanngiffiit nalaanni matoqqasarput, atuartullu efterskolimiissinnaasaratik.

Efterskolit ilaat ukiup atuarfiusup ingerlanerani ataasiarlutik arlaleriarlutilluunnit nunanut allanut paasisassarsiorlutik angalasarput. Efterskolit ilaanni angalanerit taamaattut atuarnermut ilaapput, taamaammallu immikkut akeqaratik. Qinnuteqarnissaq sioqqullugu isumassarsiatsialaassaaq paasiniassallugu angalanerit atuarnermut ilaanersut ilaannginnersulluunniit.

Danmarkimi aalisarnissaq, aallaaniarnissaq orpippasuarniluunniit ikumaartitsinissaq pillugit malittarisassaqarpoq. Taamaammat atuartut ilisimasariaqarpaat Danmarkimi Kalaallit Nunaannisut pinngortitamiittoqarsinnaanngimmat, Kalaallit Nunaannimi aalisarneq, pinialunneq imaluunniit mannissarneq nuniannerlu sungiusimaneqarput.

Peqatigiiffik Kalaallit Meerartaat suliniuteqarpoq taasaminnik Allu taannalu kalaallinut Danmarkimi efterskolertunut tamanut neqeroorutaavoq.

Allu-mi, Peqatigiiffik Kallallit Meerartaannik namminneq kajumissutsiminnik sulisut anersaartulaarfissamik attaveqaatinillu tapersersuisuusunik pilersitsisarput, unamminartunut efterskolertut efterskolimiinnerminni ukiorlu naallugu angerlarsimaffimminnik ungasissumiinnerminni nalaattagaannut naleqqiullugu ikiorsiissutaasunik.

Allu-mi peqataasut ukiup atuarfiusup ataatsip ingerlanerani sapaatip-akunnerisa naanerini sisamani naapeqatigiittarput, tassanilu nuannisaqatigiillutillu sammisaqartinneqartarlutik. Suliniummut peqataaneq akeqanngilaq.
Suliniummi Allu-mi inissat killeqarmata qinnuteqartut tamarmik inissaqarnissartik qularnaareersinnaanngilaat.