Danmarkimut aallannginnermi isumagisassat

Atuartoq Danmarkimut aallannginnermini pinngitsoorani NemID-mik pilersitsisariaqarpoq – pingaartuuvorlu atuartup NemID-minik atuinissaminik sungiussilluarnissaa.

Atuartup NemID-mik pilersitsinissaa taassuminngalu atuinissamik sungiusarluarnissaa angajoqqaat akisussaaffigaat.

NemID tassaavoq namminerisamik isissutissaq internetti aqqutigalugu sullissivinnut assigiinngitsunut isissutaasinnaasoq, atuisutut ilisarnaat aamma isissutissaq kiisalu nøglekorti atorlugit.
Nøglekorti tassaavoq isissutissat ataasiaannarluni atortakkat allassimaffiat taannalu NemID atorlugu internettikkut isernermi atorneqartussaavoq – korti pappiaramik qeratasuumik sanaajuvoq kortitut akiliutitut angitigaluni, tassanilu kisitsisit isissutissat ataasiaannarluni atugassat naqitaapput. Inassutigineqarpoq atuartup mobilimigut app-i NemID atortassagaa (nøglekorti digitaliusoq) – taamaaliornikkut nøglekortip tammarneratigut akunnattoornissaq pinaveersaarneqassaaq.

15-inik ukioqalereersimagaanni NemID-taartoqarsinnaavoq. Assigiinngitsunik periuseqarluni NemID-mik pilersitsisoqarsinnaavoq:

• Kommunip innuttaasunik sullissivia saaffigalugu (kinaanermut uppernarsaat eqqaamajuk)
• Banki aqqutigalu
• NemID uunga piniarlugu: nemid.nu (nittartagaq qallunaatuinnaq oqaasertaqarpoq – tassani NemID pilersissagaanni piumasaavoq atuartup atuuttumik pas-eqarnissaa).

NemID-mik piniarneq pillugu uani paasissutissaqarpoq: Sullissivik.gl .

PINGAARUTILIK: Atuartup NemID-mik pilersitsilernerani una akuerineqassaaq: ”ja til vilkår for OCES”. Taamaaliornikkut atuartoq pisortatigoortumik digitalimik ilisarnaateqalissaaq, NemID-lu internettikkut isernermi atorneqarsinnaalissalluni, soorlu netbankimut aamma pisortat nittartagaannut assersuutigalugu Sullissivik.gl-imut aamma Danmarkimi peqqinnissaqarfiup nittartagaanut Sundhed.dk-mut.
(OCES isumaqarpoq Offentlige Certifikater til Elektronisk Service (elektroniskimik sullissinermut pisortatigoortumik akuersissut)).

PINGAARUTILIK: Atuartoq bankimiit NemID-qareerpat kisiannili pisortatigoortumik digitalimik ilisarnaatitaqanngitsumik (offentlig digital signatur), atuartoq pisortatigoortumik digitalimik ilisarnaatitaartariaqarpoq. Tamannalu marlunnik periuseqarluni pisinnaavoq:

• Internettikkut una iserfigalugu: nemid.nu (nittartagaq taamaallaat qallunaatut oqaasertaqarpoq allannguinissamullu piumasaavoq atuuttumik pas-eqarnissaq)
• kommunimi innuttaasunik sullissivik imaluunniit banki nammineerluni saaffigineqarsinnaapput

Atuartoq Danmarkimut nuussimalerpat, peqqinnissaqarfiup nittartagaa iserfigineqassaaq: www.sundhed.dk, tassanilu NemID atorlugu iserluni. Nittartagaq aamma app-itut mobilimut ikkunneqarsinnaavoq tassanilu taaguuteqarluni ”Min sundhed”.

Nittartakkami peqqinnissaqarfimmit paasissutissat takuneqarsinnaapput, taakkua ilaatigut tassaasinnaapput nakorsamit misissortinnermit imaluunniit coronamut misissortinnermut akissutit.

Danmarkip Kalaallit Nunaatalu akornanni passeqarnissaq piumasaanngilaq kisianni atuartoq efterskolernerminut atatillugu passitaartariaqarpoq, pissutigalugu:

• Atuartoq Danmarkimi kommunimi nuuffimminni innuttaasunik sullissivimmut nammineerluni ornigulluni inuit aqqinik nalunaarsuiffimmut nalunaarniaruni kinaassutsimi uppernarsaataanik assitalimmik (passimik) nassartussaavoq

• Atuartut amerlasuut efterskolip nunanut allanut angalaneranut atatillugu passeqarnissartik pisariaqartissavaat.

Danmarkimut aallarnissaq sioqqullugu passitaareertariaqarpoq. Passi piniarneqassaaq Kalaallit Nunaanni najugaqarfimmi politeeqarfimmut saaffiginnilluni. Inuusuttut 18-it inorlugit ukiullit passitaarniarnerminni angajoqqaami arlaat politeeqarfimmut ilagisariaqarpaat.
Passitaarniarluni qinnuteqarnermi immersugassaq uani aaneqarsinnaavoq: sullissivik.gl imaluunniit uani: Grønlands politi, tassani aammattaaq takuneqarsinnaapput passip piniarnerani suut nassatassaanersut.

Sapaatip akunnerisa 3-4-t qaangiunneranni passi politeeqarfimmi aaneqarsinnaalersarpoq, taamaammat Danmarkimut aallarnissaq sioqqulluarlugu piniartariaqarpoq. Inuusuttunut 12-17-inik ukiulinnut passitaarneq akeqarpoq kr. 141 (1. marts 2021-mi).

Atuartup efterskolernermini Nunatsinni aningaaserivimmi kontoni attatiinnarsinnaavaa. Atuartoq kortimik akiliutaasartumik peqariinngippat Danmarkimut aallannginnerani sanaatsittariaqarpoq - kortip akiliutaasartussap piniarneraniit tigunissaanut piffissaq qanoq sivisutiginersoq apeqqutigisiuk kortimillu piniarlusi.

Atuartoq Akiliummik korteqarpat eqqumaffigisariaqarpoq, Akiliut Danmarkimi pisiniarfiit ilaannaanni atorsinnaammat aamma aningaasanik tigusiffiusinnaasut killeqartorujussuummata. Akiliut internettikkut niuernermut atorsinnaanngilaq.

Atuartup kortimik akiliutaasartumik sumiluunniit atuisinnaanissaa qularnaarumagaanni atuartoq assersuutigalugu MasterCard-imik imaluunniit Visa Debet-kortimik pisaartariaqarpoq. Atuartup angajoqqaavisalu bankertik oqaloqatigisariaqarpaat, korti akiliutaasartoq qanoq ittoq atuartup pisariaqartitaanut naleqqiullugu naapertuunnerpaassanersoq. Immaqa aamma atuartumut iluaqutaassaaq MobilePay-imik pilersitsinissaa, taanna Danmarkimi atugaasorujussuummat.

Atuartoq efterskolernerminut atatillugu nunanut allanut angalasussaappat, qularnaartariaqarpoq kortimik akiliutaasartumik nunani allani atorsinnaasumik peqarnissaa.

Danmarkimi efterskolernermut Namminersorlutik Oqartussanit tapiiffigineqarnissamut piumasaqaataavoq atuartup sapaatip-akunnerisa naanerini ferianilu najugaqarfigisinnaasaminik ilaqutariinnik attaveqaateqarnissaa.

Atuartup ilaqutariinnut attaveqaataasartunut pitsaasumik attaveqarnissaa pingaartuuvoq.

Atuartup ilaqutariit attaveqaataasartut pulaaraangamigit eqqaamasassai pingaarutillit makkuupput:

• qaqugukkut pulaarnissap ilaqutariinnut attaveqaataasartunut isumaqatigiissutiginissaa
• atuartoq ilaqutariit attaveqaataasartut angerlarsimaffiannut pulaartuuvoq taamaammallu ilaqutariinni malittarisassat ataqqillugillu malittariaqarlugit
• nerisassiornermut, erruinermut suliassanullu allanut ikiuunnissaq – sutigut ikiuussinnaanerup apeqqutiginissaa isumassarsiatsialaavoq
• assersuutigalugu bussinut bilitsimut kaasarfimmiussanullu aningaasanik nassataqarnissaq - ilaqutariit attaveqaataasartut atuartup akiliunnissaa pisussaaffiginngilaat
• imaassinnaavoq ilaqutariit attaveqaataasartut inussiarnisaarusuttut sorpassuarnillu misigisaqartitserusullutik. Kisimiilaarnissaq pisariaqartikkaanni ilaqutariinnut attaveqaataasartunut oqaatigisariaqarpoq, paatsoortoqarnissaa pinngitsoorumallugu