Efterskolernerup nalaani ilitsersorneqarneq siunnersorneqarnerlu

Kalaallit Danmarkimi efterskolertut Kalaallit Illuannut efterskoliminnut qaninnerpaasumut atapput. Københavnimi, Odensemi, Århusimi aamma Ålborgimi Kalaallit Illui inissisimapput.

Kalaallit Illui ilaatigut ilinniarneq pillugu ilitsersuisartunik aamma isumaginninnikkut ilitsersuisartunik sulisoqarput, taakkulu efterskolertunut naleqqiullugu assigiinngitsunik suliassaqarput. Ilinniartunik ilitsersuisartoq annermik efterskolertunik sullisisuuvoq.
Aammattaaq Kalaallit Illuisa efterskolertut inuusuttunut ilinniakkanik qinnuteqarnerini ilitsersortarpaat.

Angajoqqaat, ilaqutariit attaveqaataasut, atuartut imaluunniit efterskolit Kalaallit Illuinut saaffiginnissinnaapput, taakkualu pisariaqarfiatigut ornigussinnaapput.
Atuartoq angerlarsernini allalluunniit efterskolernerup nalaani pisut pillugit oqaloqateqarnissaminik pisariaqartitsippat, Kalaallit Illuanni ilinniarnermut ilitsersuisartoq, isumaginninnermut ilitsersuisartoq imaluunniit oqalutsi ikiuussinnaapput – taamaattoq maluginiagassaavoq Kalaallit Illui tamatigut ingerlaannaq ornigussinnaasanngimmata, taamaammallu utaqqisariaqartoqarsinnaammat. Aamma oqarasuaatikkut internettikkoorluguluunniit oqaloqatigiinnerit aaqqissuunneqarsinnaapput.

Angajoqqaat akiliutissaat, atuartup efterskolimi ulluinnarisaa apeqqutilluunniit allat atuartunut ataasiakkaanut tunngasut pillugit angajoqqaat namminneq efterskolimut attaveqartassapput.

Namminersorlutik Oqartussani Ilinniartitaanermut, Kultureqarnermut Ilageeqarnermullu Naalakkersuisoqarfiup ataani Ilinniartitaanermut Aqutsisoqarfimmi immikkoortortaqarfiuvoq.
Efterskolinut Ingerlatsivik tassaavoq susassaqarfik, Ilinniartitaanermut Naalakkersuisoqarfiup efterskolernermut tunngatillugu suliassanik ingerlatsiveqarfia.

Efterskolinut Ingerlatsivik Namminersorlutik Oqartussat Danmarkimi efterskolernermut tapiissutai allaffissornikkut ingerlappai, atuartullu efterskolernermik aallartilerneranut atatillugu angalanissaannik aaqqissuussisarluni.

Tapiissutit angalanerillu pillugit apeqqutit Efterskolinut Ingerlatsivimmut saaffiginnissutigineqassapput. Apeqqutigineqartut tassani akineqarsinnaanngippata Efterskolinut Ingerlatsiviup susassaqarfik eqqortoq innersuutissavaa.

Efterskoleforeningi Danmarkimi efterskolinut peqatigiiffiuvoq. Tassani atorfeqarpoq siunnersorti, ilaatigut efterskolinut kalaallit Danmarkimi efterskolernerannut tunngasunik siunnersuisarlutik.

Peqatigiiffiup nittartagaani atuarneqarsinnaapput paasissutissaajunnartut aamma kalaallinut inuusuttunut periarfissat, assersuutigalugu takukkit allaatigisat Tosprogede elever aamma Grønlandske elever.