Atuartoq efterskolimut sunik nassataqassava?

Efterskoli aallartinnerani atuartoq nammineq pigisaminik arlalinnik nassataqassaaq – taakku assersuutigalugit tassaasinnaapput qipik, akiseq, sinngup puua, oqorutit qalii tungerlu, allarutit, errortassaasivik, atuagaasivik, aqerluusaasivik, qarasaasiaq, cykeli (cykelhjelmi, aaqanngitsoq cykelerluni atortagaq aamma cykelip qullii ilanngullugit). Taakkua saniatigut atisat aasarsiutit, ukiorsiutit timersuutillu nassassavai.

Efterskolip nassatassanik nalunaarsuiffiani allaqqasunik atuartup nassarnissaa angajoqqaat akisussaaffigaat.

Nammineerluni atortussat atuartup nassatassai tamaasa nutaatut pisiarissagaanni kr. 10.000 – 15.000-inik akeqarsinnaapput, taakkualu soorunami annertummata ilaqutariit amerlanersaasa ileqqaarutigeqqaartariaqartarpaat.

Isumassarsiatsialaavoq misissussallugu nassatassat ilaat Danmarkimi pisiarigaanni Nunatsinni pisiarineraniit akikinnerussannginnersut.

Efterskolit ilaanni atortussat atorneqarsinnaapput attartorneqarlutilluunniit, assersuutigalugu qipik, akiseq imaluunniit cykeli. Efterskolit allat ”atualernermi poortukkamik” neqeroortarput, assersuutigalugu qipimmik, akisimik, oqorutit qaliinik tungernillu, allequttamik allarutinillu imaqartumik – angajoqqaat meeqqami efterskolissaani periarfissat suunerat misissortariaqarpaat.

Atortussanik efterskolimi atornissaq, attartornissaq pisinissarluunniit atuarnerup aallartinnissaa sioqqulluarlugu isumaqatigiissutigineqassaaq.

Inassutigineqarpoq atuarnerup aallartinnerani atuartup nassatassai ilaqutariit eqqaamasassatut allattussagaat. ”Eqqaamasassat” assersuut uani takusinnaavat: ”Efterskolimut nassatassakka”.

Eqqaamasassat allassimaffiat ingerlaavartumik nutarterneqartassaaq, atortussat angerlarsimaffimmiit nasarneqassanersut, Danmarkimi pisiarineqassanersut imaluunniit efterskolimi atorneqassanersut, attartorneqassanersut imaluunniit pisiarineqassanersut paasinerat ilutigalugu.

Atuartoq efterskolernerminut atatillugu 20 kiilut Air Greenlandip timmisartuini nassarneqarsinnaasut sinnerlugit nassataqassappat angajoqqaat timmisartumi nassataqarpallaarnermi akiliutit imaluunniit allakkerivikkut nassitsisarfimmiilluunniit nassitsinermi akiliutit namminneq akilissavaat. Aningaasartuutit taakku utertinneqarsinnaanngillat.
Tamanna aammattaaq atuuppoq atuartup efterskolereerluni angerlamut angalaneranut atatillugu.

Efterskolertussat atualernerminni nassatassaasa ilaannut annikinnerusumik aningaasatigut tapiisoqarnissaa Majoriamut qinnutigineqarsinnaavoq. Periarfissaq tamanna pillugu angajoqqaat illoqarfimminni Majoriaq attavigisinnaavaat.

Isumassarsiatsialaavoq atuartup nammineq pigisaminik iniminiititassaminik nassataqarnissaa. Atuartut amerlasuut ilaquttamik ikinngutimillu assinginik imaluunniit plakatinik, siniffimmik eqqaani nivingatitassaminnik nassataqartarput.