Timersorneq silamiinnerlu

(Tak. § 44. Atuarfimmi atuartitsissutini atuartitsissutinilu qanitariissuni alloriarfiit siunertaat kiisalu atuartitsissutit siunertaat ilikkagassatullu anguniagassat pillugit Namminersorlutik Oqartussat nalunaarutaat).
§ 44. Atuartitsinerup siunertaraa atuartut piginnaasaqalernissaat, taamaaliornikkut
timersornikkut kulturimik tamatigoortumik ilisimasaqalersillugit aalanissamullu
kajumissuseqalersillugit. Timersornerup silamiinnerullu atuartut timersornerup
silamiinnerullu peqqissutsimut ingerlalluarnissamullu pingaarutaanik kiisalu inuiaqatigiit
aamma timersornikkut silamiinnerullu kulturip imminnut ataqatigiiffiinik
misilittagaqalersillugillu paasisaqartissavai.
Imm. 2. Atuartitsinerup atuartut tamatigoortumik timersornermik silamiittarnermillu
pigiliutissavai kiisalu peqqinnerup timimullu tunngasumik kulturip tungaatigut periarfissanik
paasisaqartillugit misilittagaqartilerlugillu. Atuartut inuuneq naallugu timimik atuinerup
imminullu akisussaaffiginerup pingaaruteqassusiata paasinissaanut tunngaviit
ineriartortissavaat.
Imm. 3. Atuartitsinerup atuartut, timip ineriartortinnissaanut, timersornerup kiisalu
silamiinnerup allat ilagalugit sammisaqarnikkut kiisalu pisussaaffeqartumik
ataatsimooqatigiinnikkut akuersaartumik nuannersumillu misigisaqartissavai.
Imm. 4. Atuartitsinerup atuartut timersornerup silamiinnerullu peqqissutsimut
atugarissaarnermullu pingaarutaanik kiisalu inuiaqatigiit aamma timersornikkut
silamiinnikkut kulturip imminnut ataqatigiiffiinik misilittagaqalersillugillu paasisaqartissavai.

Siunertaq pillugu oqaaseqaat
Siunertaq ima aaqqissugaavoq:
Imm. 1-imi allaatigineqarput atuartup atuartitsissummi ilisimasassatut pisinnaasassatullu angusassai.
Imm. 2-mi allaatigineqarput atuartup inuttut inerikkiartornera namminerlu peqqissutsiminik timillu kulturianik paasinninnera.
Imm. 3-mi pineqarput atuartup allanik peqateqarluni timersornermut silamilu sammisassanut
peqataanera timersornerullu akuutitsinissamut periarfissiineri
Imm. 4-mi allaatigineqarput timersornerup inuiaqatigiinni inissisimanera pingaaruteqarneralu.

Mernguernartunik atuartitsissutit atuartut misigisaannik, pilersitaqarusunnerup nuannersuanik
itisiliisinnaanerannillu sinaakkusiisarput, taamaalilluni takorluuisinnaanerat ineriartussaaq
periarfissaminnullu tatiginninnerat anguneqarluni, aammalu isummersinnaanerat
iliuuseqarsinnaanerallu tunngavissinneqarluni.
Atuartitsinerup atuartut soqutiginnilersissavai, misileraanikkut ilusilersuinikkullu mernguernartunut alapernaatsilerlugit, ilinniartitsisorlu pinnguarnikkut meeqqat pilersitserusunnerannik aallartitaqarusunnerannillu ikorfartuillunilu inerisaassaaq, aammalu timiminnik atuinerannik, nutaaliornerannik ilusiliinernilu ingerlatsinernik.
Atuartitsissut immikkoortutut isiginagu ulluinnarni pinngortitalerinernut atuartitsissutinulluunniit humanistiskiusunut atuartitsinernut ilaatinneqassaaq. Nunarsuarmi pisut allanngoraannaavinnerat pissutigalugu ilikkartarnermik isiginnittaaserput allanngornikuuvoq, pisinnaasassamit aalajangersimasumit ataatsimit amerlanngitsunilluunniit inuuneq tamaat pisinnaasanut, ilisimasanut piginnaasassanullu assigiinngitsunut ilinniarnermut.

Naliliineq tassaavoq ilikkagassatut anguniagassat aallaavigalugit atuartut ulluinnarni atuarnerminni pissarsiaannik ingerlaavartumik naliliisarneq, ikorfartuineruvoq isumassarsiornarlunilu.
Atuartut ulluinnarni assigiinngitsorpassuartigut nalilerneqarsinnaapput. Naliliineq pitsaasarpoq atuartitsinermi siunertaq atuartunut aammalumi angajoqqaanut ersarikkaangat. Ilaatigut piariikkat inerneri nakkutiginiarlugit nalilerneqakkajunnerusarput. Allatigulli naliliinerit siunissamut ungasinnerusumut isiginiarnerusarput, tassani suliat qangarnisaanerusut nutaanerusullu, suleriaatsit atuartitsinermilluunniit ingerlatsinerit, ukiup alloriarfiulluunniit ingerlanerani piffissamik isumaqatigiissuteqarnikkut sanilliunneqarsinnaasarput. Ulluinnarni piffissallu annertunerusut akuttoqatigiissaarlugit naliliisarnerit pingaaruteqarput. Naliliineq tassaavoq atuartut, angajoqqaat ilinniartitsisullu ataatsimut atuartup ineriartornerata malinnaaffiginissaanut sakkussaq, aammalu atuartup suliaqarnerni, ingerlataqarnerni alloriarfinnilu tamani anguniagassanik angusaqarnissaanik qulakkeerinnittussaasoq.

Qisuariarfiginninneq
Qisuariarfiginninneq tassaavoq atuartitsissummi sulianik sulinerullu ingerlaneranik utertiffiginninneq.
Tassani ilinniartitsisumit atuartumuunerusarpoq, atuartulli imminnut aamma qisuariarfigisinnaapput.
Qisuariarfiginnittarneq atuartut ataatsimoornerannut iluaqutissartaqarsinnaavoq. Ilinniartitsisup qisuariarfiginninneq atuartitsissummik eqqarsaatersorfiusunngorlugu sinaakkusersinnaavaa.

Qisuariarfiginninneq ima takutinneqarsinnaavoq:
• Suna siunertaava?
• Atuartoq siunertamut naleqqiulluni sumiippa?
• Anguniagassap angunissaanut alloriarnissaq tulleq suua?