Qanoq iliorluni meeqqat atuarfianni censoriutitanngortoqartarpa?
Ilinniartitaanermut Aqutsisoqarfik ukiut tamaasa ukiumi atuarfiusumi allattariarsorluni oqaluttariarsorlunilu misilitsinnerni censoriusussanik ataqatigiissaarisarpoq. Censorinngortitaasinnaanissannut suut ilinniartitsisutut piginnaasaqarfiginissaannut tunngasut uani atuarsinnaavatit.
Indhold
Fagimi ataatsimi censorinngortitaanissannut piumasaqaatit piginnaaneqarfigisassallu makku ilinniartitsisutut naammassisimassavatit:
- Kalaallit kultureqarnerannut atuarfeqarnerannullu kiisalu inatsisinut tunngasunik ilisimasaqassaatit, tamatumunnga ilanngullugit meeqqat atuarfianni inaarutaasumik naliliineq pillugu nalunaarut misilitsittarnermullu tunngassuteqartut allat ilisimasaqarfigissallugit.
- Misilitsittoqarnissaata tungaanut atuartitsinermik naammassisaqarsimassaatit.
- Ukiut kingulliit pingasut iluanni klassimik/holdimik 10. klassimi misilitsinnissap tungaanut atuartitsisimassaatit.
- Suleqateqarsinnaassaatit, tusarnaarsinnaassaatit, aamma fagimi nalilersuinermut tunngavigineqartussat najoqqutaralugit atuartup naammassisaanik nalilersueqataasinnaassaatit.
Censorinngortitatut sulininni suliamut perorsaanermullu piumasaqaatit saniatigut inuttut piginnaaneqarnissat piumasaqaataavoq – tamatumani pineqartut ilaatigut tassaapput oqaloqateqarsinnaaneq, isumaqatiginninniarnissamut kajumissuseqarneq, inussiarnersuuneq kiisalu ikiuiumassuseqarneq. Censoritut sulineq suliaqarfinni assigiinngitsuni piginnaasaqarluarnermik suliassanilu assigiinngitsuni suleqateqarnissaanermik piumasaqaatitaqarpoq. Tamatuma saniatigut censoriunermik misilittagaqalerneq piginnaaneqarnerulernermik kinguneqartarpoq – censoriusunik allanik oqaloqateqarnikkut ilisimalikkatit misilittagarilikkatillu atuarfimmut suliffigisannut uteruit ilinniartitsisutut piginnaasaqarnerulersimasutut tunniussinnaalissavatit.
Piumasaqaatit matuma qulaani allassimasut naammassisimagukkit censorinngortitaanissannillu soqutiginnikkuit tilmeldingsblanket til censorkorps atuarfiup pisortaanut tunniussassat immersorsinnaavat.
Atuarfiup pisortaa ilinniartitsisut nalunaarsimasut piginnaassusiinik nalilersuisussaavoq, censoriusussatullu naleqqunnerpaatitaminik Ilinniartitaanermut Aqutsisoqarfimmut allagaqarlunilu atsiornermigut innersuussisussaatitaalluni.
Kingusinnerpaamik qaqugu tunniussisoqassanersoq ukiumut pilersaarummi imm. 12-imi takuuk.
Censoriusussanik ataqatigiissaarineq
Atuarfiit siunnersuutaat aallaavigalugit Ilinniartitaanermut Aqutsisoqarfiup oqaluttariarsorluni allattariarsorlunilu misilitsinnerni censoriusussat ataqatigiissassavai. Aqutsisoqarfiup innersuunneqarsimasuni kikkut censoriussanersut toqqassavai, censoriusussallu allattorsimaffii atuarfiit pisortaannut, ilinniartitsisunut ilisimatitsisussanut, tunniutissallugit.
Censoriusussanngortitaasut tamarmik censorinngortitaanertik pillugu Ilinniartitaanermut Aqutsisoqarfimmit allagarsiumaarput. Ilinniartitsisut toqqagaasimanngitsut allagarsissanngillat. Censoriusussanngortitaanissamut tunngasumik nalornissuteqaruit atuarfiup pisortaa attaveqarfigissavat.
Misilitsinnissat tungaannut assigiinngitsunik peqquteqarluni censoriusussat allattorsimaffiat allannguuteqarsinnaavoq/nutarterneqarsinnaavoq. Atuarfiit censoriusussallu allannguiffigineqartussat Ilinniartitaanermut Aqutsisoqarfiup misilitsinnerit pillugit immikkoortortaqarfianit attavigineqarumaarput.
Kingullermik nutarterneqarpoq: 2. marts 2026