Pimmatiginnittarneq akiorniarlugu periusissiaq

Inatsisartut 2019-imi upernaakkut ataatsimiinnerminni aalajangiuppaat, meeqqat inuusuttullu ilinniartoqarfiini tamani, tassalu ulluunerani paaqqinnittarfinni, meeqqat atuarfiini inuusuttullu ilinniarfiini, pimmatiginnittarneq akiorniarlugu nuna tamakkerlugu periusissiamik ineriartortitsisoqassasoq.

Taamanikkut Naalakkersuisuusimasut kissaatigaat meeqqanut suli atualinngitsunut imikkoortortaqarfinni, meeqqat atuarfianni kiisalu inuusuttut ilinniarfiini tamakkiisumik isiginnittumik periusissiamik suliaqartoqassasoq, pinngitsoornanilu siammasissuussasoq tamatigoortuullunilu. Suliap ingerlanneqarnerani Naalakkersuisut, kommunit allallu susassaqarfiit akimut suleqatigiilluinnarlutik pinissaat pisariaqarpoq, Ilinniartitaanermut Aqutsisoqarfik suliniummut akisussaasoralugu ataqatigiissaarisoralugulu pimmatiginnittarneq akiorniarlugu pitsaaliuinissamik akiornissaanullu suliaqassaaq.

Periusissiaq pimmatiginnittarneq pillugu ilisimatusarnermit nutaanerpaamit kiisalu nunatsinni meeqqat, inuusuttut inersimasullu akornanni pimmatiginnittarneq pillugu misissuinernit tunngaveqarpoq.

Periusissiami pimmatiginnittarnermik akiuiniarnermik suliaqarneq sammineqarpoq, tamanna inuiaqatigiit ataatsimut susassaralugulu akisussaaffigisaat. Suliamik aallartisaaneq august 2022-miit ingerlanneqalissaaq, ukiunilu pingasuni sivisussuseqassalluni. Ukiut pingasut siulliit suliassat atuutsikkiartuaarneqalerfissaattut isigineqassapput, innersuussutit aallaavigalugit sammisaqartitsilluni suliniutit aallartisarneqassapput, Kalaallit Nunaanni najugaq aallaavigalugu sumiiffinni assigiinngitsuni ingerlanneqalerlutillu ataatsimut aaqqissugaassallutik.
​

Periusissiaq aajuk

Nuna tamakkerlugu pimmatiginnittarneq akiorniarlugu periusissiami meeqqamut isiginnittariaaseq nuannersoq tassaavoq:

Pimmatiginninneq akiorniarlugu suliniuteqarnermi meeqqamut isiginnittariaatsimiipput qanilaarneq, tusarnaarneq, isumassuineq, nakkutiginnilluarneq kiisalu meeqqanut inuusuttuaqqanullu paasinninneq.

Qanilaarnissaq tassaavoq meeqqat pissusilersuutaannik soqutiginnilluni sulineq.

Isumassuinissaq tassaavoq meeqqat ajornartorsiutaanngitsutut isiginissaat, meeqqalli ajornartorsiutaat ajornartorsiutaasutut isiginissaat.

Tusarnaarnissaq tassaavoq meeqqat inuusuttullu tusarnaarlugit pimoorullugillu sammisarinissaat.

Nakkutiginnilluarnissaq tassaavoq kinguaariit tulliuttut paarilluassallugit sapinngisarpullu tamaat iliuuseqarfigalugu kiisalu inussiarnersuunissaq meeqqamut isiginnittaaseq aallaavigalugu sulinermi tunngaviusumik aallaaviunissaa, tassalu periusissiap tunngaviusumik suliniutaa.

Kingullermik nutarterneqarpoq: 12. august 2026

Kingullermik nutarterneqarpoq: 12. august 2025