Inuttut inerikkiartorneq

Atuartitsinerup siunertaraa, atuartut atuarfiup ataatsimooqatigiiffiini akuersaartumik peqataanissartik ilinniassagaat. Aammattaaq atuartut namminneq periarfissatik nalilersorneri, anguniagassalerneq, pilersaarusiorneq kiisalu tunngavilersorluakkamik atuarnerminni ilinniaqqinnerminnilu qinersinissartik ilinniassagaat. Aammattaaq atuartut tarnikkut timikkullu peqqissumik inuuneqarnissamut piumasaqaataasut ilisimasaqarfigilissavaat, ilanngullugit ajornartorsiutit inuulluarniutinut aanngajaarniutinullu malittaasartut. Atuartut tunngaviusumik ilisimasaqarfigissavaat atuarfimmi, angerlarsimaffimmi, inuiaqatigiit akornanni, attaveqaqatigiiffinni pinngortitamilu isumannaatsuuneq. Atuartut aamma ilisimasaqarfigilissavaat ilaqutariinni, avatangiisini aningaasarsiornermilu sinaakkutarineqartut, inuiaqatigiit inuit ulluinnaannut sinaakkusiuttagaat kiisalu naleqartitani pisussaaffinnilu ilaqutariinni, suliffimmi aamma inuiaqatigiit ataatsimoorfiinut attuumassuteqartuni.

Namminersornerullutik Oqartussat nalunaarutaanni alloriarfiit atuartitsissutillu siunertaat, ilikkagassatullu anguniagassat kap. 12-mi atuakkit.

Ikaarsaariarnermi aalajangersagaq ilanngunneqarpoq, taannalu malillugu atuartut ukiumi atuarfiusumi 2023-2024-mi 8. klassimi klassimiluunniit qaffasinnerusumi aallartittut, nalunaarummi pisoqqami aalajangersakkat naapertorlugit atuartinneqassapput. Imaappoq nalunaarut nutaaq taamaallaat atuutissasoq atuartunut ukiumi atuarfiusumi 2023-2024-mi 1.-7. klassini atualersunut.