(Tak. § 48. Atuarfimmi atuartitsissutini atuartitsissutinilu qanitariissuni alloriarfiit siunertaat kiisalu
atuartitsissutit siunertaat ilikkagassatullu anguniagassat pillugit Namminersorlutik Oqartussat
nalunaarutaat).
§ 48. Atuartitsinerup siunertaraa, atuartut atuartitsissummi Nipilersornermi nipilersornermik
misigisaqarnissamut nipilersornerlu pillugu oqariartuuteqarsinnaanikkut piginnaasatik
ineriartortissagaat. Atuartitsissutip tunngavilissavaa inuuneq naallugu nipilersornermut
peqataasinnaaneq kiisalu inuiaqatigiit nipilersornikkut neqeroorutaat assigiinngitsorpassuit
isummerfigisinnaassagaat.
Imm. 2. Atuartitsinerup atuartut misigisanik nuannersunik pigiliussaqartissavaa kiisalu
nipilersukkanik pilersitseqataaffiullunilu pinngortitseqataaffigissallugu.
Imm. 3. Atuartitsinerup kingunerisa ilagissavaat atuartut misigissutsimikkut silassorissutsimikkullu
ineriartornerat, aallussisinnaanerannut nukimminnillu aqutsisinnaanerat, kiisalu atuartut
ataatsimooqatigiiffiup iluanni peqataasutut imminnut isigisinnaanerat.
Imm. 4. Atuartitsinerup atuartut, kalaallit allamiullu nipilersoriaasaasa kulturimut ilaasutut,
paasinninnerat ineriartortissavaa, ilaatigut ulluinnarni inuiaqatigiinni ilaasutut ilaatigullu
oqaluttuarisaanermut sanilliullugu.
Siunertaq pillugu oqaaseqaat
Siunertaq ima aaqqissugaavoq:
Imm. 1-imi allaatigineqarput atuartup atuartitsissummi ilisimasassatut pisinnaasassatullu angusassai.
Imm. 2-mi allaatigineqarput atuartup inuttut inerikkiartornera namminerlu nipilersornera,
pilersitsisinnaanera paasinninneralu
Imm. 3-mi pineqarput atuartup nipilersornermi misigisaminik paasinninnera atuineralu,
nipilersornerup timimut, misigissutsinut eqqarsaatinulluunniit sunniutai aammalu nipilersornerup
akuutitsinissamut periarfissiinera
Imm. 4-mi allaatigineqarput nipilersornerup nunarsuarmi inissisimaffia atorneqarneralu, aammalu
atuartunut nipilersornerup oqaluttuassartaani piffissanik kulturinillu, kiisalu inunnik nipilersornikkut
pingaarutilinnik paasisimasaqalernissaat.
Naliliineq tassaavoq ilikkagassatut anguniagassat aallaavigalugit atuartut ulluinnarni atuarnerminni
pissarsiaannik ingerlaavartumik naliliisarneq, ikorfartuineruvoq isumassarsiornarlunilu.
Atuartut ulluinnarni assigiinngitsorpassuartigut nalilerneqarsinnaapput. Naliliineq pitsaasarpoq
atuartitsinermi siunertaq atuartunut aammalumi angajoqqaanut ersarikkaangat. Ilaatigut piariikkat
inerneri nakkutiginiarlugit nalilerneqakkajunnerusarput. Allatigulli naliliinerit siunissamut
ungasinnerusumut isiginiarnerusarput, tassani suliat qangarnisaanerusut nutaanerusullu, suleriaatsit
atuartitsinermilluunniit ingerlatsinerit, ukiup alloriarfiulluunniit ingerlanerani piffissamik
isumaqatigiissuteqarnikkut sanilliunneqarsinnaasarput. Ulluinnarni piffissallu annertunerusut
akuttoqatigiissaarlugit naliliisarnerit pingaaruteqarput. Naliliineq tassaavoq atuartut, angajoqqaat
ilinniartitsisullu ataatsimut atuartup ineriartornerata malinnaaffiginissaanut sakkussaq, aammalu
atuartup suliaqarnerni, ingerlataqarnerni alloriarfinnilu tamani anguniagassanik angusaqarnissaanik
qulakkeerinnittussaasoq.
Qisuariarfiginninneq
Qisuariarfiginninneq tassaavoq atuartitsissummi sulianik sulinerullu ingerlaneranik utertiffiginninneq.
Tassani ilinniartitsisumit atuartumuunerusarpoq, atuartulli imminnut aamma qisuariarfigisinnaapput.
Qisuariarfiginnittarneq atuartut ataatsimoornerannut iluaqutissartaqarsinnaavoq. Ilinniartitsisup
qisuariarfiginninneq atuartitsissummik eqqarsaatersorfiusunngorlugu sinaakkusersinnaavaa.
Qisuariarfiginninneq ima takutinneqarsinnaavoq:
• Suna siunertaava?
• Atuartoq siunertamut naleqqiulluni sumiippa?
• Anguniagassap angunissaanut alloriarnissaq tulleq suua?