Inuiaqatigiilerineq

(Atuarfimmi atuartitsissutini atuartitsissutinilu qanitariissuni alloriarfiit siunertaat aamma atuartitsissutit siunertaat kiisalu ilikkagassatut anguniagassat pillugit Namminersornerullutik Oqartussat nalunaarutaanni § 22 tunngavigalugu.)
§ 22. Atuartitsinerup siunertaraa atuartut inuiaqatigiit inuiaqatigiillu ineriartornerisa
eqqarsaatigilluakkamik isummerfiginissaannut piginnaasaqartitseqataalernissaq. Inuiaqatigiinnut tamat oqartussaaqataanerat tunngavigalugu ingerlasunut ineriartornerannullu namminneq suliniuteqarlutik peqataanissaminnut atuartut piginnaasaqalissapput. Atuartut paasissavaat, inuit inuunerminni atugarisaasa aamma pissutsit pinngortitameersut inuillu pilersitaasa imminnut ataqatigiinnerat aamma allannguutit inuunermi atugarisanut inuiaqatigiinnilu inuunermut qanoq kinguneqartarnerat.
Imm. 2. Atuartitsinerup kingunerisa ilagissavaat, atuartut namminneq kulturikkut inuiaqatigiinnullu tunngasutigut sumut atanerminnik paasinninnerat. Atuartitsinerup aammattaaq kingunerisa ilagissavaat, atuartut apeqqusiisinnaanerminnik ineriartortitsinerat. Atuartut atuartitsissutip periarfissarisaanik paasinninnertik inerisassavaat, atuartitsinerullu atuartut namminneq ilikkariartornerminnut akisussaaqataalersissavai.
Imm. 3. Atuartitsinerup kingunerisa ilagissavaat, atuartut politikkikkut inuiaqatigiinnullu
tunngasutigut apeqqutit ajornartorsiutillu pillugit soqutiginnilernerat, aamma paasissagaat inuit allat isummertarnerannut iliuuserisartagaannullu oqaluttuarisaanermi aamma inooqatigiissutsikkut aningaasaqarnikkullu pissutsit aamma pingaartitatigut assigiinngitsunik isiginneriaaseqarnerit tunuliaqutaasartut.
Imm. 4. Atuartitsinerup kingunerisa ilagissavaat, atuartut, tamat oqartussaaqataaneranni
tunngaviit maleruartakkallu pillugit isummersornerat, namminneq inuiaqatigiinni peqataanissartik siunertaralugu. Atuartitsinerup aammattaaq atuartut kulturit inuiaqatigiinnilu maleruartakkat allat pillugit paasisaqartissavai.

Siunertaq pillugu oqaaseqaat
Siunertaq ima aaqqissugaavoq:
Imm. 1-imi pineqarput atuartup atuarnermini piginnaasassai tigussaasut – atuartitsissutissarpiaat.
Imm. 2-mi pineqarput atuartup inuiaqatigiit pillugit ilikkakkani tunngavigalugit piginnaasami inuttut ineriartornissaminut, kinaassutsimi nukittorsarnissaanut ilivitsuunissaminullu atuinissaa – inummi namminermiittut.
Imm. 3-mi pineqarput atuartup allanik suleqateqarluni inuit allat paasinissaanut piginnaasaminik atuinissaa – inoqateqarneq.
Imm. 4-mi pineqarput atuartup sumiiffimmini inuiaallu akornanni inuiaqatigiinni tamat
oqartussaaqataanerannik nukittorsaanermut kulturillu akornanni akuersaarnermut piginnaasaminik atuinissaa – inuiaqatigiinnut kulturimullu tunngasut pingaarnerit.

Inuiaqatigiilerinermi taaguutit tunngaviusut suleriaatsillu atuarnerup ingerlanerani tamarmiusumi ataatsimut isigalugit ineriartortinneqassapput. Atuartitsineq atuartitsissutinik allanik akimuilluni, projektini sammisaqarnerniluunniit ingerlanneqarsinnaavoq.
Inuiaqatigiilerinermi sumiiffimmi nunarsuarmiluunniit inuiaqatigiinni ajornartorsiutit inuiaqatigiit
ineriartornerannut tunngasut, atuartullu apeqqusiisinnaanerannik ineriartortitseqataasinnaasut sammineqassapput.
Atuartitsissummi qitiupput: kulturi inuiaqatigiillu, politikki inuillu pisinnaatitaaffii, aningaasaqarneq, kinaassuseq ataatsimooqatigiinnerlu, kiisalu angajullerni inuiaqatigiilerinermi periutsit.
Atuartitsissummi suleriaatsit periutsillu atorneqartut tassaasinnaapput piginnaasassat nalinginnaasut atuartitsissutinut allanut tunngassutillit atuartullu ilinniarnerannut ineriartortitseqataasinnaasut.
Atuartut inuiaqatigiinni peqataanerat eqqarsaatigalugu tamat oqartussaaqataaneranni tunngaviit maleruartakkallu isummersorfigisassavaat, imaappoq tamat oqartussaaqataaneranni pingaartitat paasinninnerillu, aammalu inuiaqatigiinni tamanit oqartussaaqataaffiusuni maleruartakkat suunersut paasillugillu oqallisigisinnaassavaat.

Naliliineq tassaavoq ilikkagassatut anguniagassat aallaavigalugit atuartut ulluinnarni atuarnerminni pissarsiaannik ingerlaavartumik naliliisarneq, ikorfartuineruvoq isumassarsiornarlunilu.
Atuartut ulluinnarni assigiinngitsorpassuartigut nalilerneqarsinnaapput. Naliliineq pitsaasarpoq atuartitsinermi siunertaq atuartunut aammalumi angajoqqaanut ersarikkaangat. Ilaatigut piariikkat inerneri nakkutiginiarlugit nalilerneqakkajunnerusarput. Allatigulli naliliinerit siunissamut ungasinnerusumut isiginiarnerusarput, tassani suliat qangarnisaanerusut nutaanerusullu, suleriaatsit atuartitsinermilluunniit ingerlatsinerit, ukiup alloriarfiulluunniit ingerlanerani piffissamik isumaqatigiissuteqarnikkut sanilliunneqarsinnaasarput. Ulluinnarni piffissallu annertunerusut akuttoqatigiissaarlugit naliliisarnerit pingaaruteqarput. Naliliineq tassaavoq atuartut, angajoqqaat ilinniartitsisullu ataatsimut atuartup ineriartornerata malinnaaffiginissaanut sakkussaq, aammalu atuartup suliaqarnerni, ingerlataqarnerni alloriarfinnilu tamani anguniagassanik angusaqarnissaanik qulakkeerinnittussaasoq.

Qisuariarfiginninneq
Qisuariarfiginninneq tassaavoq atuartitsissummi sulianik sulinerullu ingerlaneranik utertiffiginninneq. Tassani ilinniartitsisumit atuartumuunerusarpoq, atuartulli imminnut aamma qisuariarfigisinnaapput. Qisuariarfiginnittarneq atuartut ataatsimoornerannut iluaqutissartaqarsinnaavoq. Ilinniartitsisup qisuariarfiginninneq atuartitsissummik eqqarsaatersorfiusunngorlugu sinaakkusersinnaavaa.

Qisuariarfiginninneq ima takutinneqarsinnaavoq:
• Suna siunertaava?
• Atuartoq siunertamut naleqqiulluni sumiippa?
• Anguniagassap angunissaanut alloriarnissaq tulleq suua?