Matematikki

(Atuarfimmi atuartitsissutini atuartitsissutinilu qanitariissuni alloriarfiit siunertaat aamma atuartitsissutit siunertaat kiisalu ilikkagassatut anguniagassat pillugit Namminersornerullutik Oqartussat nalunaarutaanni § 26 tunngavigalugu.)
§ 26. Atuartitsissutip siunertaraa atuartut tunngavisumik matematikkimi piginnaaneqalissasut.
Atuartut atuartitsissummi taaguutinut tunngasunik sungiussissapput. Matematikkimi apeqqutit
ulluinnarni inuunermut, inuiaqatigiinni inuunermut pinngortitamilu pissutsinut tunngasut
paasinissaat suliarinissaallu atuartut sungiussimassavaat. Atuartitsinerup qulakkiissavaa atuartut atuartitsissutini allani ilinniaqqinnissaminnut pisariaqartunik, matematikkimi ilisimasassanik pisinnaasassanillu pigiliussinissaat.
Imm. 2. Atuartitsinerup kingunerisa ilagissavaat, atuartut paasissammassuk matematikkimi
suliassat suliarinissaannut atorneqarsinnaallunilu pilersitsilluni suliaqarnermut atorneqarsinnaanera, kiisalu takorluuisinnaanerminnik alapernaassutsiminnillu ineriartortitsinissaannut. Atuartut atuartitsissutip periarfissarisai pillugit ilisimaarinninnertik ineriartortissavaat.
Imm. 3. Atuartitsinerup kingunerisa ilagissavaat, atuartut ulluinnarni matematikkimik
paasinnillutillu atuisinnaalernerat. Atuartitsinerup kingunerisa ilagissavaat atuartut misissuillutik eqqarsaatigisarialinnillu sammisaqarnerit aqqutigalugit, namminneerlutik ataatsimoorlutillu namminneq inerniliinissamut periusissaminnik ujartuinermik sungiussinerat.
Imm. 4. Atuartitsinerup kingunerisa ilagissavaat atuartut kulturimut inuiaqatigiinnullu atatillugu
matematikkip pingaarutaanik misilittagaqalerlutillu paasinninnerat. Aammattaaq atuartitsinerup kingunerisa ilagissavaat, atuartut inuiaqatigiinni tamat oqartussaaqataaffigisaanni akisussaaqataaniarnerminnut sunneeqataaniarnerminnullu matematikkip atuuffiinik nalilersuisumik isummersorfiginnissinnaanngornerat.

Siunertaq pillugu oqaaseqaat
Siunertaq ima aaqqissugaavoq:
Imm. 1-imi allaatigineqarput atuartup atuartitsissummi piginnaasatut angusassai. Atuartut
ajornartorsiutit ulluinnarni inuunermut, inuiaqatigiit inuunerannut pinngortitamullu atassuserlugit matematikkimi misissoqqissaarsinnaallugit paasillugillu suliarisinnaassavaat.
Imm. 2-mi allaatigineqarput atuartup ilisimassagaa matematikki sakkussaasoq aammalu
pilersitsiviusoq. Atuartut namminneq pisinnaanerminnik upperinnillutik meeqqat atuarfiata kingorna ilinnialernissaminnut matematikkimi piginnaasassaminnik ineriartortitsissapput.
Imm. 3-mi allaatigineqarput atuartup ulluinnarni matematikkimi piginnaasani paasillugillu
atorsinnaagai. Atuartut namminneq allanillu suleqateqarlutik atuarfimmi matematikki aqqutigalugu ulluinnarni sakkussaminnik ineriartortitsissapput.
Imm. 4 allaatigineqarput atuartitsissutip kulturimut inuiaqatigiinnullu naleqqiulluni inissisimaffia, tassanilu atuartup inuiaqatigiinni tamat oqartussaaqataaffigisaanni akisussaasutut inooqataanera. Atuartut sumiiffimmi nunarsuarmilu tamarmi matematikkip kulturimut inuiaqatigiinnullu ilaanera paasisinnaasariaqarpaat.

Atuarnerup ingerlanerani tamarmiusumi matematikkimi taaguutit suleriaatsillu tunngaviusut
ataatsimut isiginneriaaseqarluni ineriartortinneqassapput, atuartitsissummi aammalu matematikki atuartitsissutinik akimuilluni ingerlataqarnermi, projektini sammisaqarnernilu ilaatinneqartillugu.
Matematikki ilisimatuussutsimik aallaaveqarpoq, matematikkip iluani ilisimasanik nutaanik
ineriartortitsisartoq aammalu atuartitsissutini qanitariissuni allani apeqqutinik akissuteqarsinnaasoq.
Atuartitsissut sammisassartaqarpoq matematikkip sakkutut aaqqissuussaaneranut tunnganerusunik.
Atuartitsissutissatut sammisassat allaaserineqarput Kisitsisilerineq algebrallu, Geometriip aammalu Naatsorsueqqissaarneq ilimanassutsillu ataanni. Sammisassami kingullermiipput matematikkimi piginnaasassat arfinillit. Siunertaavoq ilinniartitsisup atuartitsinermini matematikkimi sammisassanik matematikkimilu piginnaasassanik tapertariisitsisarnissaa.
Matematikki atuartitsissutaavoq sakkussatut, tassaniillutik atuartup matematikkimi piginnaasai atuartitsissutini allani ilinniarnermi pisariallit. Matematikki sakkuuvoq aaqqissuussaq ulluinnarni, inuiaqatigiit inuuneranni sulinermilu atorneqartussaq.

Naliliineq tassaavoq ilikkagassatut anguniagassat aallaavigalugit atuartut ulluinnarni atuarnerminni pissarsiaannik ingerlaavartumik naliliisarneq, ikorfartuineruvoq isumassarsiornarlunilu.
Atuartut ulluinnarni assigiinngitsorpassuartigut nalilerneqarsinnaapput. Naliliineq pitsaasarpoq atuartitsinermi siunertaq atuartunut aammalumi angajoqqaanut ersarikkaangat. Ilaatigut piariikkat inerneri nakkutiginiarlugit nalilerneqakkajunnerusarput. Allatigulli naliliinerit siunissamut ungasinnerusumut isiginiarnerusarput, tassani suliat qangarnisaanerusut nutaanerusullu, suleriaatsit atuartitsinermilluunniit ingerlatsinerit, ukiup alloriarfiulluunniit ingerlanerani piffissamik isumaqatigiissuteqarnikkut sanilliunneqarsinnaasarput. Ulluinnarni piffissallu annertunerusut akuttoqatigiissaarlugit naliliisarnerit pingaaruteqarput. Naliliineq tassaavoq atuartut, angajoqqaat ilinniartitsisullu ataatsimut atuartup ineriartornerata malinnaaffiginissaanut sakkussaq, aammalu atuartup suliaqarnerni, ingerlataqarnerni alloriarfinnilu tamani anguniagassanik angusaqarnissaanik qulakkeerinnittussaasoq.

Qisuariarfiginninneq
Qisuariarfiginninneq tassaavoq atuartitsissummi sulianik sulinerullu ingerlaneranik utertiffiginninneq.
Tassani ilinniartitsisumit atuartumuunerusarpoq, atuartulli imminnut aamma qisuariarfigisinnaapput.
Qisuariarfiginnittarneq atuartut ataatsimoornerannut iluaqutissartaqarsinnaavoq. Ilinniartitsisup qisuariarfiginninneq atuartitsissummik eqqarsaatersorfiusunngorlugu sinaakkusersinnaavaa.

Qisuariarfiginninneq ima takutinneqarsinnaavoq:
• Suna siunertaava?
• Atuartoq siunertamut naleqqiulluni sumiippa?
• Anguniagassap angunissaanut alloriarnissaq tulleq suua?