(Atuarfimmi atuartitsissutini atuartitsissutinilu qanitariissuni alloriarfiit siunertaat aamma atuartitsissutit siunertaat kiisalu ilikkagassatut anguniagassat pillugit Namminersornerullutik Oqartussat nalunaarutaanni § 42 tunngavigalugu)
§42. Atuartut, atuartitsissummi qinigassami teknologimik paasinninnermi, ilusilersuinermut ingerlaatsinik kiisalu atortut digitaliusut misissoqqissaarnerinut piginnaasatik inerikkiartortissavaat.
Imm. 2. Atuartitsissutip atuartut tunngavississavaat isumassarsiamut eqqarsarnermik, isumassarsiamik misiliinermik naammassinninnermillu kiisalu atortunik teknologiskiusunik atuinissaminnut isorinnittumik eqqarsaatersortarnissaannik.
Imm. 3. Atuartitsinerup kingunerisa ilagissavaat atuartut ilusilersuinikkut/ilusileeqqinnikkut suliaqarnitik pitsanngorsassagaat kiisalu qanoq misissuisoqartarnersoq, paasinnittoqartarnersoq, naliliisoqartarnersorlu ilikkassagaat aammalu atortut digitaliusut qanoq nalilersorneqartarnersut.
Imm. 4. Atuartitsinerup pitsanngorsassavaa atuartut koderinermi kiisalu atortut digitaliusut periarfissaasa atornissaat inuiaqatigiinnilu inissisimanerat, digitaliseringip ulluinnarni sunniuteqartarnerata paasisaqarfiginissaa anguniarlugu.
Siunertaq pillugu oqaaseqaat
Imm. 1-imi allaatigineqarput atuartitsissummi teknologimik paasinninnermi atuartup ilisimasassatut pisinnaasassatullu angusassai.
Imm. 2-mi allaatigineqarput atuartut kodningimi ineriartornissaat
Imm. 3-mi pineqarput atuartup ilusilersuinermut ingerlaatsinik paasinninnera atuisinnaaneralu
Imm. 4-mi allaatigineqarput digitaliseeriinerup ulluinnarnik ilusilersueqataaneranik atuartup paasinninnera
Nunami pingaartinneqarpoq atuartut qanoq ineriartussanersut, kajumilersinneqarnissaat siunissamilu inuiaqatigiinni peqataanissaminnut pisinnaasassaminnik ineriartortitsinissaat.
Ullutsinni meerartagut tusagassiuutinik teknologimillu atuiinnaratik 21. århundredekkunni piginnaasassatigut ineriartussapput, nassatarissavaalu atuartut suleqateqartarnissamik eqqarsaateqartarnissaat, nutaaliornermik,attaveqaqatigiinnermik teknologiimillu ulluinnarni aaqqiissutissanik suliaqarsinnaanermik, kiisalu teknologinut digitaliusunut alapernaannermik apeqqusiisinnaanermillu ilinniassapput.
Atuartitsissummi atuartut ulluinnarni ajornartorsiutit tigussaasut ilisimasatik aallaavigalugit pisinnaasatik ineriartortissavaat, tassanilu misissuineq pilersitsinerlu aqqutaasassaaq. Ilusiliiniarnerup ingerlaasia (misissuineq – paasinninneq – inerisaaneq – naliliineq nalilersuinerlu) kodenillu misileraanerit nalerisaanerillu teknikkiannik ilisimasaqalernissaq atuartitsissummi pingaaruteqarluinnarput.
Atuartut suliaminnik pilersitsinissaat, atortullu digitaliusut isumaliutiginerisigut nangeqattaarlugit ingerlattarnissaat siunertaavoq. Atuartitsissummi ilusilersuinermi ingerlaatsit koderinerillu aqqutigalugit atuartut pilersitsisinnaassusaat, pimoorussinerat, alapernaannerat pilersitsinerullu nuannissusaata misiginissaanut qiimmassarneqassapput.
Atuartitsineq suliaqarnermik aallaaveqassaaq. Suliaqarnermi ilinniartitsisumik allanillu atuartitsissummut attuumassutilinnik oqaloqateqarnikkut teknikkit arlallit atuartut ilinniassavaat piginnaasassallu ineriartortillugit.
Naliliineq tassaavoq ilikkagassatut anguniagassat aallaavigalugit atuartut ulluinnarni atuarnerminni
pissarsiaannik ingerlaavartumik naliliisarneq, ikorfartuineruvoq isumassarsiornarlunilu.
Atuartut ulluinnarni assigiinngitsorpassuartigut nalilerneqarsinnaapput. Naliliineq pitsaasarpoq
atuartitsinermi siunertaq atuartunut aammalumi angajoqqaanut ersarikkaangat. Ilaatigut piariikkat
inerneri nakkutiginiarlugit nalilerneqakkajunnerusarput. Allatigulli naliliinerit siunissamut
ungasinnerusumut isiginiarnerusarput, tassani suliat qangarnisaanerusut nutaanerusullu, suleriaatsit
atuartitsinermilluunniit ingerlatsinerit, ukiup alloriarfiulluunniit ingerlanerani piffissamik
isumaqatigiissuteqarnikkut sanilliunneqarsinnaasarput. Ulluinnarni piffissallu annertunerusut
akuttoqatigiissaarlugit naliliisarnerit pingaaruteqarput. Naliliineq tassaavoq atuartut, angajoqqaat
ilinniartitsisullu ataatsimut atuartup ineriartornerata malinnaaffiginissaanut sakkussaq, aammalu
atuartup suliaqarnerni, ingerlataqarnerni alloriarfinnilu tamani anguniagassanik angusaqarnissaanik
qulakkeerinnittussaasoq.
Qisuariarfiginninneq
Qisuariarfiginninneq tassaavoq atuartitsissummi sulianik sulinerullu ingerlaneranik utertiffiginninneq.
Tassani ilinniartitsisumit atuartumuunerusarpoq, atuartulli imminnut aamma qisuariarfigisinnaapput.
Qisuariarfiginnittarneq atuartut ataatsimoornerannut iluaqutissartaqarsinnaavoq. Ilinniartitsisup
qisuariarfiginninneq atuartitsissummik eqqarsaatersorfiusunngorlugu sinaakkusersinnaavaa.
Qisuariarfiginninneq ima takutinneqarsinnaavoq:
• Suna siunertaava?
• Atuartoq siunertamut naleqqiulluni sumiippa?
• Anguniagassap angunissaanut alloriarnissaq tulleq suua?